«KazSat-3» jer serigi 2013 jyly ushyrylatyn boldy
TANA. 19 qyrkúıek. QazAqparat /Aıdar Ospanalıev/ - «KazSat-3» jer serigi 2013 jyly ushyrylatyn boldy. Bul týraly búgin Parlament Májilisinde ótip jatqan Úkimet saǵatynda QR Ulttyq ǵarysh agenttiginiń tóraǵasy Talǵat Musabaev málim etti.
Onyń sózine qaraǵanda, ǵaryshqa ushatyn apparatty taǵy da reseılik kompanııa jasaıdy. «Bıylǵy jyldyń 20 tamyzynda Parıj qalasynyń Le Býrje halyqaralyq avıatsııalyq-ǵarysh salonynda Reseı Federatsııasynyń «Akademık Reshetnıkov atyndaǵy aqparattyq spýtnıktik júıeleri» kompanııasy men elimizdiń Ǵarysh baılanys ortalyǵy arasynda úshinshi baılanys apparatyn qurastyrý jónindegi kelisimge qol qoıyldy. Osy qujat talaptary boıynsha jobany negizinen reseılik kompanııa júzege asyratyn boldy. Al jer serigin ǵaryshqa ushyrý sharasy 2013 jylǵa josparlanyp otyr. Osylaısha biz ózimizdiń spýtnıktik júıeler tobyn júzege asyrýdy aıaqtaımyz. Eger joba sátimen júzege assa, biz sheteldik operatorlarǵa táýeldilikten arylamyz»,-dedi Agenttik tóraǵasy.
