«KazSat-3» spýtnıgine - 5 jyl
«KazSat-3» ǵarysh qurylǵysy Baıqońyrdyń № 81 alańynan «Lých-5V» ǵarysh apparatymen, «Brız-M» údetkish blogymen jáne «Proton-M» zymyran-tasyǵyshymen ushyrylǵan edi.
Úshinshi qazaqstandyq baılanys jáne habar taratý serigi Reseıdiń «Akademık M.F.Reshetnev atyndaǵy «Aqparattyq spýtnıktik júıeler» (ASJ) AAQ kásiporny men Thales Alenia Space (Italııa) kompanııasymen birlesip, «Respýblıkalyq ǵarysh baılanys ortalyǵy» AQ (RǴBO) tapsyrysy boıynsha jasaldy.
RǴBO men ASJ arasyndaǵy «KazSat-3» spýtnıgin shyǵarý týraly kelisimshartqa 2011 jyldyń 20 maýsymynda Lıa Býrjedegi (Frantsııa) áýe- ǵarysh salony jumysynyń aıasynda qol qoıyldy.
Segiz aı ótkennen keıin, 2014 jyldyń 29 jeltoqsanynda «RǴBO» AQ KazSat-3 baılanys jáne habar taratý ǵarysh qurylǵysyn reseılik óndiristen qabyldady. 2015 jyldyń 23 qańtarynda Qazǵarysh buıryǵymen qurylǵan arnaıy komıssııa «KazSat-3» baılanys ǵarysh júıesin jasaý boıynsha joba nátıjesin jáne Aqkól qalasyndaǵy ǵarysh apparattaryn basqarý keshenin qabyldaý týraly aktige qol qoıdy. 2016 jyldyń 1 naýryzynda «OTAU TV» ulttyq spýtnıktik televıdenıe abonentterin osy bortqa aýystyrylǵany jáne synaqtyń aıaqtalǵany jarııalandy. 2017 jyly elimizdiń barlyq telehabary «KazSat» ulttyq baılanys jáne habar taratý spýtnıkterine tolyqtaı kóshirildi.
«RǴBO» AQ Basqarma tóraǵasy Baýyrjan Qudabaev bizdiń agentke bergen suhbatynda «KazSat-3» spýtnıgi shtattyq rejimde jumys istep turǵanyn habarlady. Kazsat serııaly ǵarysh qurylǵylarynyń transponderli syıymdylyǵy qazirgi ýaqytta 74% qurap otyr.
Búgingi tańda «KazSat» ulttyq baılanys spýtnıkteri arqyly jerde 12 myńnan astam spýtnıktik baılanys stansasy jumys istep tur. Osy ǵarysh júıesiniń arqasynda 8 jylda ishki naryqta 47 mlrd teńgege ımportty almastyrýǵa qol jetkizildi. 2019 jyly qazaqstandyq baılanys spýtnıkteri qyzmetterinen túsken tabys 6 mlrd teńgeden asady dep josparlanyp otyr.
Avtory Sara Qabıqyzy