«KazSat-3» baılanys jerserigin jasaý men ushyrýǵa konkýrs jarııalandy
ASTANA. Naýryzdyń 27-si. QazAqparat - «Ǵaryshtyq baılanys jáne radıoelektrondyq quraldardyń elektr magnıttik úılesimdiligi respýblıkalyq ortalyǵy» aktsıonerlik qoǵamy «KazSat-3» jerserigin jasaý men ushyrý boıynsha konkýrs jarııalady.
QR «Memlekettik satyp alý týraly» Zańyna sáıkes QR Ulttyq ǵarysh agenttigine (Qazǵarysh) vedomstvolyq baǵynysty «Ǵaryshtyq baılanys jáne radıoelektrondyq quraldardyń elektr magnıttik úılesimdiligi respýblıkalyq ortalyǵy» AQ sheteldik ǵaryshtyq apparattar jasaýshylardy «KazSat-3» baılanys jáne habar taratý ulttyq geostatsıonarlyq jerserigin jasaý men ushyrý boıynsha ashyq konkýrsqa qatysýǵa shaqyrady», delingen vedomstvonyń habarlamasynda.
Konkýrsqa qatysýǵa tehnıkalyq ótinishter 2010 jylǵy maýsymnyń 15-ine deıin qabyldanady.
Konkýrsty ótkizý sharttary, qatysýshylardy tirkeý tártibi, satyp alynatyn qyzmetter úshin talap etiletin tehnıkalyq, sapalyq, paıdalaný sıpattamalary, olardyń kólemi, merzimderi jáne kóptegen basqa talaptar týraly kompanııanyń saıtynan bilýge bolady - www.rcsc.kz .
Esterińizge sala keteıik, «Ǵaryshtyq baılanys jáne radıoelektrondyq quraldardyń elektr magnıttik úılesimdiligi respýblıkalyq ortalyǵy» aktsıonerlik qoǵamy men M.Hrýnıchev atyndaǵy Reseı memlekettik ǵaryshtyq ǵylymı-óndiristik ortalyǵynyń arasynda 2006 jyly qol qoıylǵan kelisimshartqa sáıkes qazirgi tańda qazaqstandyq ekinshi «KazSat-2» baılanys jerserigin jasaý jáne ushyrý jónindegi jumystar júrgizilip jatyr. «KazSat-2» apparatyn 2010 jyldyń jeltoqsan aıynda «Baıqońyrdan» ushyrý josparlanyp otyr.
