«Qazsat-2» jer serigi aǵymdaǵy jyldyń jeltoqsan aıynda ushyrylatyn boldy
ASTANA. Sáýirdiń 12-si. QazAqparat /Aıdar Ospanalıev/ - «Qazsat-2» jer serigin qazaqstandyqtar aǵymdaǵy jyldyń jeltoqsan aıynda ushyrýdy josparlap otyr.
Bul týraly búgin Astanada «Qazaqstannyń ǵaryshty ıgerý dáýiri: qazirgi jaǵdaıy, strategııa, ınnovatsııalar» atty taqyrypta ótken konferentsııa barysynda Ulttyq ǵarysh agenttiginiń tóraǵasy, Talǵat Musabaev málim etti, dep habarlaıdy QazAqparat.
Onyń sózine qaraǵanda, «Qazsat-1» apparatynyń isten shyǵýynyń kóptegen sebepteri bar. Olardyń eń bastysy jer serigine tapsyrys berýshilerdiń ózderi kásibı mamandar emes bolyp shyqty. Olar ulttyq ınnovatsııalyq qor qyzmetkerleriniń ókilderi. Eń ókinishtisi, olar jer serigin buryn -sońdy múldem jasap kórmegenderge tapsyrys bergen.
«Soǵan qaramastan, agenttik ókilderi jaǵdaı osylaı boldy eken dep qol qýsyryp qarap otyrǵan joq. Biz osyǵan deıingi qatelikterdiń qaıtadan oryn almaýy úshin qoldan kelgenniń barlyǵyn qarastyryp otyrmyz», dedi agenttik tóraǵasy.
