«QazSat-2» jáne «OS-2» serikterin alyp ushatyn «Proton-M» zymyran tasymaldaǵyshy ushý alańyna ornatyldy - «Baıqońyr»
BAIQOŃYR. 11 shilde. QazAqparat /Sara Qabıqyzy/ - Qazaqstandyq «QazSat-2» jáne amerıkandyq «OS-2» serikterin alyp ushatyn «Proton-M» zymyran tasymaldaǵyshy búgin «Baıqońyr» ǵarysh aılaǵynyń №200 alańyna shyǵarylyp, ushyrý keshenine ornatyldy.
«Reseıǵarysh» agenttiginiń baspasóz qyzmetinen habarlaǵandaı, zymyran tasymaldaǵyshtyń ushyrýǵa daıyndyǵy týraly sheshim keshe memlekettik komıssııanyń otyrysynda qabyldandy. Búgin ushý alańyna ornatylǵannan keıin, zymyran tasymaldaǵyshqa qyzmet kórsetý júıeleri tartylyp, birinshi ushyrý kúniniń kestesi boıynsha jumystar bastaldy.
Zymyran tasymaldaǵyshtyń syrtqy shyǵarylý jáne alańǵa ornatylý barysyn qadaǵalaǵan Qazǵaryshtyń Baıqońyr departamentiniń dırektory Ǵalymjan Danbaev, barlyq daıyndyq jumystarynyń kestege sáıkes júrgizilip jatqanyn, al keme 16 shilde kúni Astana ýaqyty boıynsha saǵat 05.16-da ushyrylatynyn málim etti.
«Baıqońyrǵa» keshe kelgen «Habar» agenttiginiń túsirý toby qazaqstandyq ekinshi baılanys seriginiń ushý daıyndyǵynyń barysy týraly materıal daıyndap jatyr.
