«QazSat-2» spýtnıgi belgilengen merzimde ushyrylmaı qalýy da múmkin - Ulttyq ǵarysh agenttiginiń tóraǵasy
ASTANA. 3 qarasha. QazAqparat /Aıdar Ospanalıev/ - «QazSat-2» spýtnıgi aǵymdaǵy jyldyń jeltoqsan aıynda ushyrylady. Alaıda onyń belgilengen merzimde ushyrylmaýy da múmkin. Bul týraly búgin BNews.kz portalynda ótken onlaın-konferentsııa barysynda Ulttyq ǵarysh agenttiginiń tóraǵasy Talǵat Musabaev málim etti.
Onyń sózine qaraǵanda, aldyn-ala jasalǵan kelisim boıynsha reseılikter bul jer serigin 2009 jyldyń jeltoqsan aıynda ushyrýy qajet bolatyn. Alaıda reseılikter kelisimge ózgeris engizip, taǵy bir jyl ýaqyt berýdi surady. «Onyń ózi reseılikter úshin az bolyp otyr. Osylaısha endi «KazSat-2» spýtnıgi osy jyldyń jeltoqsan aıynda ushyrylýy qajet dep otyrmyz. Alaıda onyń belgilengen merziminde ushyrylmaı qalýy múmkin degen de kúdigimiz bar», - dedi agenttik tóraǵasy.
Onyń aıtýynsha, spýtnık ýaqytynda ushyrylmaı qalǵan jaǵdaıda Qazaqstan tarapy óziniń talaptaryn qoıyp, aıyppul sanktsııalaryn sala alady. «Basqasha aıtqanda biz bul máselege keshendi túrde daıyndaldyq», dedi T.Musabaev.
