«KazSat-2» qyzmeti 2016 jyldan bastap Qazaqstannyń baılanys operatorlarymen tolyq qamtylady
ASTANA. QazAqparat - «KazSat-2» spýtnıktik júıesi 2016 jyldan bastap qazaqstandyq baılanys operatorlarynyń júktemesimen 100 paıyz qamtamasyz etiledi. Búgin Parlament Májilisinde ótken Úkimet saǵatynda QR Baılanys jáne aqparat agenttigi tóraǵasynyń birinshi orynbasary Sáken Sársenov osylaı málimdedi.
Toqtala ketetin jaıt Úkimet saǵaty barysynda depýtat Quttyqoja Ydyrysov ulttyq ǵarysh apparaty qyzmet etkenimen, qazaqstandyq baılanys operatorlary spýtnıktik syıymdylyqty shetelden jalǵa alyp otyrǵanyn alǵa tartqan edi. Óz kezeginde depýtat saýalyna jaýap bere kele Ulttyq ǵarysh agenttiginiń tóraǵasy Talǵat Musabaev «KazSat» sekildi ǵaryshtyq baılanys júıesi arqyly Qazaqstannyń aqparattyq qaýipsizdik deńgeıi arta túsetinin, bul rette baılanys operatorlary sheteldik spýtnıkten qazaqstandyq spýtnıkke aýysýy tıistigin aıtty. Al «KazSat-3» spýtnıgi iske qosylǵannan bastap, ulttyq ǵaryshtyq baılanys júıesi Qazaqstanda naryqtyń 100 paıyz suranysyn jaba alady. «Alaıda, 2014 jyldyń mamyr aıyndaǵy derekke sáıkes, ǵarysh baılanysy qyzmetteri naryǵyndaǵy «KazSat» ǵarysh baılanysynyń úlesi bar-joǵy 38 paıyz shamasynda. Baılanys-taratý operatorlary sheteldik syıymdylyqty jalǵa alýdy jalǵastyryp keledi. Sondyqtan da, qarjy shetelge ketip jatyr», - degen agenttik basshysy máseleni sheshý maqsatynda Baılanys jáne aqparat agenttigine, Úkimetke birneshe ret ótinish jasaǵanyn alǵa tartty. Qazir otandyq baılanys operatorlaryn birtindep «KazSat-2» jáne «KazSat-3» ulttyq ǵarysh júıesine kóshirý jumystary júrip jatqan tárizdi. Al dál osy máselege qatysty jaýap bergen Baılanys jáne aqparat agenttigi tóraǵasynyń birinshi orynbasary Sáken Sársenovtiń aıtýynsha, búgingi tańda otandyq operatorlardy «KazSat-2» syıymdylyǵyna aýdarý josparynyń kestesi bekitilgen. «Ókinishke qaraı, bizdegi baılanys operatorlary sheteldik spýtnıkter ıelerimen uzaqmerzimdi kelisimge otyryp qoıǵan. Al ondaı kelisimsharttardy buzý olarǵa aıyppul sanktsııalary retinde úlken shyǵyn ákeledi. Degenmen, 2016 jyldan bastap baılanys operatorlarymen «KazSat-2» jer seriginiń 100 paıyz júktemesin qamtamasyz etemiz. Al «KazSat-3» jer serigi qyrkúıekte óz núktesine ornnalasqannan soń rezervtik resýrs retinde qoldanylady», - dedi S. Sársenov. Onyń sózine qaraǵanda, «KazSat-2» ulttyq júıesi básekege qabiletti ári onyń baǵasy da ornyqty. «Ókinishke qaraı, bizdiń otandyq baılanys operatorlary buǵan deıin sheteldiktermen jasalǵan kelisimsharttaryn buza almaı otyr», - dedi ol.
