«QazSat-2» el ıgiligi úshin 12 jyl qyzmet etpek»- respýblıkalyq basylymdarǵa sholý
***
«Qazaqstan Respýblıkasynyń Syrtqy ister mınıstri Erjan Qazyhanov Belgııa, Ulybrıtanııa jáne Germanııaǵa úsh kúndik jumys saparyn 18 shildede Belgııa astanasy Brıýsselde sheteldik buqaralyq aqparat quraldary ókilderine arnaıy brıfıng ótkizýden bastady», - dep jazady «Egemen Qazaqstan» gazeti búgingi sanyndaǵy «Ornyqty saıasattyń naqty kórinisi» degen taqyryptaǵy maqalasynda. Basylymnyń atap ótýinshe, E.Qazyhanov elimizdiń jetken jetistikterin aıta kelip, halyqaralyq arenadaǵy birqatar jaǵdaılar barysyna da toqtaldy. Ásirese, Keden odaǵyna qatysty mınıstr onyń Qazaqstanǵa ǵana emes, sondaı-aq osy óńirlerde jumys istegisi keletin eýropalyq kompanııalar úshin de tıimdi bolatynyn atap ótti.
Osy kúnderi Qytaıdyń Shanhaı qalasynda sý sporty túrlerinen álem chempıonaty ótýde. Baıraqty básekege álemniń kóptegen elderimen qatar Qazaqstan komandasy da qatysýda. Osyǵan oraı «Egemen Qazaqstan» gazetinde «Júldeli oryndar jetkizbeı tur» degen taqyryppen maqala jarııalandy. Ázirshe bul básekede Qazaqstan sportshylary kóńil kónshiterlik nátıje kórsete almaı keledi. Sınhrondy júzýden ótken juptyq synda Anna Kýlkına men Áıgerim Jeksembıeva 17-shi oryndy ıelendi. Al jekeleı synda (solo) óner kórsetken Anna Kýlkına 13-shi oryn alyp, fınaldyq kezeńge shyǵa almady. Sý sportynan bıyl 14-shi ret jalaýyn kótergen jarys 31 shildege deıin jalǵasady. Osy ýaqyt ishinde sporttyń 5 túri boıynsha 66 medal jıyntyǵy sarapqa salynady. Sýǵa sekirý, júzý, vaterpol, ashyq sýda jarys, jáne sınhrondy júzýden syndar ótedi.
***
«Aıqyn» gazetiniń jazýynsha, ótken senbide ǵarysh tuńǵıyǵyna jol tartqan qazaqstandyq jer serigi qalypty jumys istep tur. Reseı ǵarysh mekemesiniń jetekshileri Qazaqstan Úkimetiniń basshylyǵyna osyny málimdedi. Keshe Premer-mınıstr Kárim Másimov RF Federaldyq ǵarysh agenttiginiń basshysy Vladımır Popovkındi onyń qazaqstandyq áriptesi - Talǵat Musabaevpen birge qabyldady. «Roskosmos» basshysy V.Popovkınniń sendirýinshe, ǵaryshta «QazSat-2» endigi shtattyq rejımde jumys isteýde, onyń barlyq júıeleri qazirgi kezeńine sáıkes qyzmet etýde. Bul jaıynda tereńirek «QazSat-2» el ıgiligi úshin 12 jyl qyzmet etpek» degen maqaladan bile alasyzdar.
«Nebári týra eki apta qaldy... Nege deısiz ǵoı, eger Amerıka memlekettik qaryz lımıtin ósirmese, 2 tamyz kúni amalsyz defolt bolǵanyn jarııalamaq. Árıne tehnıkalyq defolt», - dep jazady «Aıqyn» gazeti «Álem nege alańdaýly?» degen maqalasynda. Jarııalanymda joǵarydaǵy jaıtqa baılanysty birqatar boljamdar da berilgen. Olardyń boljamynsha aldaǵy ýaqytta jaǵdaı bylaı óristemek: birinshiden, qundy qaǵazdar rynogy qulaıdy, munaı, metall jáne ózge de shıkizattyń baǵasy kúrt tómendeıdi. Ekinshiden, dollar qunsyzdanady. Úshinshiden, nesıe júıesi kúıreıdi. Munyń janynda 2008 jylǵy ıpotekalyq daǵdarys balanyń oıynshyǵy bolyp qalmaq. Boljamdardyń kelesi bir parasyn jáne qazaqstandyq qarjygerlerdiń paıymyn bilgińiz kelse, basylymnyń búgingi nómirine kóz júgirtińiz.
***
«Alash aınasy» gazetiniń turaqty «Dat!» aıdarynda QR Munaı jáne gaz mınıstri Saýat Myńbaevpen aradaǵy suhbat «2016 jyldan bastap Eýro-5 standartyna saı joǵary oktandy benzın óndirý josparda bar» degen taqyryppen berilgen. Basylym tilshisiniń barlyq saýaldaryna tuşymdy jaýap bergen ol Qashaǵandaǵy «qara altyndy» óndirý merzimine baılanysty suraqqa: «Qazirgi ýaqytta Qashaǵandaǵy merdiger kommertsııalyq óndirýdi belgilengen merzimde bastaý úshin bar múmkindigin jumyldyryp jatyr. Ázirge jumys kestesinen aıtarlyqtaı aýytqý yqtımaldyǵy joq», - depti. Suhbattyń tolyq nusqasyn gazettiń búgingi nómirinen oqı alasyzdar.
Qazaqstan janar-jaǵarmaı boıynsha ishki suranysty 2015 jyldan bastap qana tolyqtaı qanaǵattandyra alady. Bul týraly taıaýdaǵy on-laın suhbatynda Úkimet basshysy Kárim Másimov málimdegen edi. Sol suhbatynda Premer-Mınıstr osy máselege qatysty pikirinde bizdiń naryǵymyzda janar-jaǵarmaı tasymaldaýshylar arasyndaǵy básekelestikte ádiletsizdiń oryn alyp jatqanyn moıyndap, atalǵan mámele sheshimine atsalysatyndyǵyn aıtty. Al «ádiletsiz básekelestik» degenimiz ne? Ol qandaı jaǵdaıda týyndaıdy? Bul jaıynda egjeı-tegjeıli bilgińiz kelse «Alash aınasy» gazetindegi «Benzın baǵasyn qymbattatatyn bes sebep» degen maqalaǵa nazar salyńyz.
***
«Keshe Premer-Mınıstr Kárim Másimov Reseı Federatsııasy Federaldyq ǵarysh agenttiginiń basshysy Vladımır Popovkınmen jáne Qazaqstan Respýblıkasy Ulttyq ǵarysh agenttiginiń tóraǵasy Talǵat Musabaevpen kezdesti», - dep jazady «Kazahstanskaıa pravda» gazeti. Kezdesý barysynda ǵarysh salasyndaǵy yntymaqtastyqty damytý máseleleri, sonyń ishinde ǵylymı-zertteý jobalaryn iske asyrý talqylandy, sondaı-aq Baıqońyr ǵarysh aılaǵyn birlesip paıdalaný bolashaǵy qaraldy.
