Qazirgi jastarǵa eki abzats mátin jazýdyń ózi qıyn — Nazgúl Qojabek
ASTANA. KAZINFORM — Qazirgi jastar arasynda kitap oqý azaıyp, jazý mashyǵy álsiregeni baıqalady. Bul týraly BIZDIÑ ORTA podkastynda til janashyry, redaktor ári medıa mamany, «Kalkasyz qazaq tili» Telegram arnasynyń avtory Nazgúl Qojabek aıtty.
— Qazir jastar arasynda kitap oqý azaıyp ketkeni baıqalyp otyr. Adamnyń oqyǵan kitabyndaǵy sóılem qurylymy esinde qalady ǵoı. Al qazirgi kezde shynymen kitap oqymaǵan, biz kórgen fılmderdi kórmegen jastar kóbeıgen. Búgin memleket te sonyń ornyn toltyrýǵa talpynyp jatyr. Buıryqtar shyǵyp, naýqan bastaldy. «Áttegen-aı» degen dúnıeler endi durystalady degen úmit bar, — dedi ol.
Nazgúl Qojabek mekteptegi qazaq tilin oqytýda da másele bar ekenin aıtty. Onyń sózinshe, buryn oqýshylar mazmundama, shyǵarma jazý arqyly oıyn qaǵazǵa túsirýge mashyqtansa, qazir bul daǵdy álsiregen.
— Reformalardyń saldarynan mektepterdegi qazaq tilin oqytý da qatty aqsap qaldy. Biz sııaqty mazmundama, shyǵarma jazyp ósken urpaq joq qazir. Dıktanttyń ózin balalar qınalyp jazady. Eki bet shyǵarma jazýdy bylaı qoıǵanda, eki abzatstyń ózin qınalyp jazady. Eń basty aqsap turǵany — leksıka emes, grammatıka. Olar grammatıkany bilmeıdi, — dedi Nazgúl Qojabek.
