Qazirgi jastar nege bir jumysta uzaq turaqtamaıdy — psıholog pikiri
ASTANA. KAZINFORM — Qazirgi jastar úshin jumys burynǵydaı tek turaqty aılyq alatyn oryn emes. Olar ózine qyzyq orta, erkindik jáne damý múmkindigin izdeıdi. Sondyqtan jastardy jumysta ustap qalý úshin jumys júıesi men basqarý tásili de ózgerýi kerek. Bul týraly otbasy psıhologi Erjan Myrzabaev BIZDIÑ ORTA podkastynda aıtty.
Mamannyń aıtýynsha, qazirgi jastar bir jumysta uzaq ýaqyt jumys isteýdi qalypty nárse dep qabyldamaıdy.
— Kóp jastar jumysqa eń aldymen tájirıbe jınaý úshin keledi. Biraz ýaqyttan keıin óz kásibin ashýǵa nemese basqa baǵytqa aýysýǵa tyrysady. Bir jaǵynan bul olardyń erkin oılaıtynyn kórsetedi. Biraq ekinshi jaǵynan munyń táýekeli de bar. Eger jastar bir jerde turaqtamasa, bul bolashaqta kadr tapshylyǵyna áser etýi múmkin, — dedi psıholog.
Onyń sózinshe, qoǵam úshin turaqty jumys isteıtin mamandar asa mańyzdy.
— Bizge turaqty jumys isteıtin dárigerler, muǵalimder, polıtsııa qyzmetkerleri men memlekettik qyzmetshiler qajet. Sondyqtan jastardy jumysta ustap qalý máselesi qazir óte ózekti bolyp otyr, — deıdi maman.
Psıholog qazirgi jastar úshin jumystaǵy atmosfera men qarym-qatynastyń mańyzdy ekenin atap ótti.
— Qazirgi jastar tek aılyq úshin jumys istegisi kelmeıdi. Olar óz eńbeginiń baǵalanǵanyn, pikiriniń eskerilgenin qalaıdy. Eger jumys unamasa nemese únemi qysym sezinse, esh qınalmaı ketip qalady. Sebebi olar psıhologııalyq jaılylyqqa kóbirek mán beredi, — dedi Erjan Myrzabaev.
Sarapshynyń pikirinshe, qazirgi eńbek naryǵynda basshy men qyzmetker arasyndaǵy qarym-qatynas ta ózgerýi kerek.
— Buryn «basshy ne aıtsa, sol bolady» degen túsinik boldy. Al qazir jastarǵa tek talap qoıatyn emes, qoldaý kórsetetin basshy qajet. Olar óz eńbeginiń baǵalanǵanyn sezingisi keledi. Sonda ǵana jumysqa degen qyzyǵýshylyǵy saqtalady, — deıdi ol.
Onyń aıtýynsha, memleket úshin jas ári bilimdi mamandar asa mańyzdy.
— Memleket árdaıym jas urpaqqa muqtaj. Sebebi eldiń bolashaǵy bilimdi jastarǵa baılanysty. Prezıdent Qasym-Jomart Toqaev ta jastardy táýelsiz eldiń tiregi dep jıi aıtady. Sondyqtan jastarǵa qolaıly orta qalyptastyryp, olardy qyzyqtyra bilý qajet, — dep túıindedi Erjan Myrzabaev.
Aıta keteıik, buǵan deıin psıholog zýmerlerdiń mazasyzdyǵy týraly aıtqan edi.
