Qazirgi sotsıologtardy qoǵamdaǵy qandaı máseleler mazalaıdy
ALMATY. KAZINFORM - Almatyda «Qazirgi álemdegi biregeılik máseleleri: áleýmettanýlyq ólshem» taqyrybynda túrkitildes elder áleýmettanýshylarynyń qatysýymen Qazaqstan áleýmettanýshylarynyń kezekti VIII Kongresi ótip jatyr.
Іs-shara Qazaqstan áleýmettanýshylar qaýymdastyǵynyń bastamasymen uıymdastyryldy. Kongres barysynda Qazaqstan, Túrkııa, Reseı, Ózbekstan jáne ózge de memleketterden kelgen jetekshi ǵalymdar men sarapshylardy áleýmettik ǵylymdardyń ártúrli salalary arasynda derektermen, ádistermen jáne teorııalarmen almasady.
- Bizdiń forýmnyń negizgi taqyryby - áleýmettik uqsastyq, ıakı áleýmettik biregeılik. Menińshe, áleýmettik uqsastyq sózin qoldanǵan durys. Sebebi aǵylshyn tiliniń “social identity” sózinen aýdarylady. Bul taqyrypty biraz oılanyp tańdadyq. Sebebi qazirgi kezde áleýmettik uqsastyq qoǵamdy biriktirýshi faktorǵa aınalyp tur. Sondaı-aq áleýmettik uqsastyq búgingi jáne erteńgi saıasatpen tyǵyz baılanysty. Sondyqtan bul taqyryp óte mańyzdy jáne ózekti, - dedi Qazaqstan áleýmettanýshylar qaýymdastyǵynyń prezıdenti Marat Tájın.
Al Qoldanbaly etnosaıası zertteýler ınstıtýtynyń dırektor orynbasary, áleýmettaný ǵylymdarynyń doktory Aıgúl Sádýaqasova álem áleýmettanýshylarynyń aldynda turǵan basty suraqqa toqtaldy. Onyń aıtýynsha, tsıfrlyq quraldardyń damýymen adamdar óz sáıkestigin ártúrli ortalardan izdeı bastaǵan.
- Ár adamnyń belgili bir ortamen baılanysy bolady. Biraq tsıfrlyq álem ósken saıyn adam óziniń sáıkestigin qaıdan izdeıdi, ne nársege súıenedi, qaı toptan qundylyq alady degen suraq barsha álemniń áleýmettanýshylarynyń aldynda tur. Biz úırengen otbasylyq, etnostyq, kásibılik sáıkestik bar. Alaıda qazirgi ýaqytta bul óte qubylmaly baılanys, - dedi ol.
Aıta ketken jón, Qazaqstan áleýmettanýshylar qaýymdastyǵy – 2002 jyly sotsıogýmanıtarlyq baǵyttaǵy ǵalymdardyń kúshin biriktirý maqsatynda qurylǵan qoǵamdyq kásibı berlestik. 2003 jyldan bastap QÁQ Halyqaralyq áleýmettanýlyq qaýymdastyqtyń turaqty múshesi.
Eske salaıyq, buǵan deıin Almatyda Qazaqstan men Aýǵanstan arasyndaǵy saýda-ekonomıkalyq yntymaqtastyqty damytýǵa baǵyttalǵan «Qazaqstan-Aýǵanstan» bıznes-forýmy ótkenin jazǵanbyz.
