Qazirgi reformalar aldaǵy saıası damýdyń berik negizin qalaıdy — Armenııadan kelgen baıqaýshy
ASTANA. KAZINFORM – Armenııa Ortalyq saılaý komıssııasynyń halyqaralyq yntymaqtastyq jáne qoǵammen baılanys basqarmasynyń basshysy Ermıne Arýtıýnıan elordadaǵy Q. Myńbaev atyndaǵy mektep-lıtseıge baryp, № 131 saılaý ýchaskesiniń jumysymen tanysty.
Armenııa Ortalyq saılaý komıssııa delegatsııasy Qazaqstan Ortalyq saılaý komıssııasynyń resmı shaqyrýymen daýys berý bastalardan bir kún buryn elimizge kelgen. Ermıne Arýtıýnıannyń aıtýynsha, sapardyń alǵashqy saǵattarynan bastap halyqaralyq sarapshylarǵa saılaýǵa daıyndyq barysymen tanysýǵa jáne saılaý ýchaskelerin aralaýǵa múmkindik berilgen.
— Biz daýys berýge bir kún qalǵanda keldik. Keshe Ortalyq saılaý komıssııasynyń jumysymen tanysýǵa múmkindik aldyq. Ortalyq saılaý komıssııasy atqaryp jatqan jumystyń aýqymy bizge erekshe áser etti, — dedi spıker.
Ol Qazaqstanǵa bul alǵashqy sapary emes ekenin atap ótti. Halyqaralyq baıqaýshylar Qazaqstanda atqarylǵan aýqymdy jumysqa erekshe nazar aýdarǵan. Olardyń aıtýynsha, saılaý ınfraqurylymy joǵary deńgeıde ázirlengen. Barlyq rásim qoldanystaǵy zańnamanyń qatań talaptaryna saı ári naqty jolǵa qoıylǵan. Bul saılaýdyń barlyq kezeńindegi barynsha ashyqtyqty qamtamasyz etedi.
— Daýys berý kúni azamattardyń belsendiligi joǵary ekenin kórip otyrmyz. Demalys kúnine qaramastan, el turǵyndary tańerteńnen bastap saılaý ýchaskelerine belsendi túrde kelip jatyr. Daýys berý barysy esh kedergisiz, birqalypty ótýde. Bul árbir saılaýshyǵa qolaıly jaǵdaı jasalǵanyn kórsetedi, — dedi Ermıne Arýtıýnıan.
Ol saılaý ýchaskelerinde merekelik kóńil-kúıdiń ornaǵanyn da atap ótti.
— Armenııa Respýblıkasynyń júz paıyzdyq proportsıonaldy saılaý júıesine negizdelgen parlamenttik júıe aıasynda kópjyldyq tájirıbesi bar. Sondyqtan Qazaqstanda osyǵan uqsas tetikterdiń is júzinde qalaı júzege asyrylyp jatqanyn úlken qyzyǵýshylyqpen baqylap otyrmyz. Qazirgi reformalar eldiń aldaǵy saıası damýynyń berik negizin qalaıdy, — dedi Armenııa Respýblıkasy Ortalyq saılaý komıssııasynyń halyqaralyq yntymaqtastyq jáne qoǵammen baılanys basqarmasynyń basshysy.
Halyqaralyq baıqaýshylardyń joǵary baǵasyna ıe bolǵan negizgi baǵyttardyń biri — Qazaqstandaǵy saılaý úderisiniń tsıfrlandyrylý deńgeıi. Saılaýǵa daıyndyq jáne ony ótkizý barysynda zamanaýı tehnologııalyq sheshimderdiń, elektrondy servıster men ınnovatsııalyq tásilderdiń qoldanylýy júıeniń ashyqtyǵy men tehnologııalyq turǵydan jetilgenin kórsetedi.
Aıta ketelik Grýzııadan kelgen halyqaralyq baıqaýshy alǵashqy Quryltaı saılaýynyń uıymdastyrý deńgeıin joǵary baǵalaǵan edi.
