Qazirgi Olımpıadalyq qozǵalys ashyq dıalogty talap etedi — Golovkın
ASTANA. KAZINFORM — Qazaqstan Ulttyq Olımpıadalyq komıtetiniń prezıdenti Gennadıı Golovkın Shveıtsarııanyń Lozanna qalasyndaǵy Olımpıadalyq úıde ótken Olympism 365 komıssııasynyń otyrysyna qatysty. Bul týraly UOK málim etti.
Bul shara Halyqaralyq Olımpıadalyq komıtettiń (HOK) Komıssııa aptalyǵy men Fit for the Future (F4F) atty keńes berý kezdesýleri aıasynda ótti. F4F — Olımpıadalyq qozǵalystyń saıasatyn jańartý jáne basqarý júıesin jetildirý maqsatynda HOK prezıdenti Kırstı Koventrıdiń bastamasymen qolǵa alynǵan baǵyt.
Otyrysta Qazaqstan UOK prezıdenti shaǵyn talqylaý toptarynyń jumysyna qatysyp, Olympism 365 tujyrymdamasy turǵysynan negizgi taqyryptardy talqylady. Atap aıtqanda, sportshylardy damytý, Olımpıada oıyndaryn uıymdastyrý, Olımpıadalyq qozǵalystyń turaqtylyǵy, sporttyń kirshiksiz álem qalyptastyrýdaǵy róli, sondaı-aq, aýdıtorııany keńeıtý men turaqty qarjylandyrý máseleleri qaraldy.
Kezdesý formaty árqaısysy shamamen 45 mınýtqa sozylatyn taqyryptyq sessııalardan turdy. Ár sessııadan keıin qatysýshylar basqa toptarǵa aýysyp otyrdy.
«Sporttyń álemdi ózgertýdegi róli» taqyrybyndaǵy pikirtalas barysynda Gennadıı Golovkın sportty bilim, densaýlyq pen kóshbasshylyqtyń tıimdi quraly retinde qarastyrýdyń mańyzyn atap ótti. Ol ásirese jastar, bosqyndar jáne áleýmettik osal toptar úshin sporttyń áleýetin kúsheıtý qajet ekenin aıtty. Sondaı-aq halyqaralyq uıymdarmen, memlekettik qurylymdarmen jáne azamattyq qoǵammen seriktestik ornatýǵa daıyn ekenin jetkizdi.
Sonymen qatar UOK basshysy Olympism 365 jáne Olımpıadalyq yntymaqtastyq bastamalary aıasynda árbir baǵdarlamanyń nátıjesine nazar aýdarý qajet ekenin atap ótti. Bul — ınklıýzııa, klımat, teńdik nemese turaqtylyq sekildi baǵyttardy qamtıdy.
— Qazirgi Olımpıadalyq qozǵalys únemi jańaryp, ashyq dıalogty talap etedi. Fit for the Future keńes berý formaty túrli eldiń ókilderin biriktirip, sportty turaqty damytý men onyń qundylyqtaryn nyǵaıtý jolynda ortaq sheshim izdeýge múmkindik beredi, — dedi Qazaqstan UOK prezıdenti Gennadıı Golovkın.
Aıta keteıik, Golovkın World Boxing uıymynyń prezıdenti laýazymyna resmı túrde úmitker atanǵan bolatyn.