Qazirgi geosaıası jaǵdaı etek-jeńdi jınaýǵa májbúr etedi – áskerı sarapshy pikiri
ASTANA. KAZINFORM – Qaqtyǵys oshaqtary irgege taıap qaldy. BIZDIÑ ORTA podkastynda jýrnalıst, áskerı sarapshy Amangeldi Qurmetuly osyndaı pikir aıtty.
– Qazir qarý-jaraq óndirisi men saýdasy asa qarqyndy damyp jatyr. Álemniń qarý-jaraq naryǵyndaǵy 100 kompanııanyń tizimine kóptegen jańa oıynshy qosyldy. Mysaly, Túrkııanyń 4-5 kompanııasy endi. Odan bólek, Ońtústik Koreıa, Pákistan t.b. elderdi ataýǵa bolady. Qarý-jaraq naryǵy úlken naryqqa aınaldy, – dedi ol.
Sondaı-aq, Amangeldi Qurmetulynyń sózinshe, jahandaǵy qaqtyǵystar dıplomatııanyń qadirin ketirip, túrli aımaqtaǵy beıbereketsizdikke sebep bolyp otyr.
– Mundaı oshaqtar buryn bizden alys sııaqty kórinetin. Qazir irgege kelip qaldy. Ýkraına jaǵynan da, Iran jaǵynan da qarasaq, tym taıaý. Buryn Orta Azııaǵa qaýip retinde tek Aýǵanstan baǵytyn ǵana qarastyratyn edik. Ózge aımaqtar tynysh bolatyn, – deıdi sarapshy.
Onyń aıtýynsha, qazirgi geosaıası jaǵdaı etek-jeńdi árqashan jınap otyrýǵa jáne qyraǵy bolýǵa májbúr etedi.
– Álemdegi geosaıası ahýalǵa qarasaq, qoǵamnyń yntymaq-birligi men ishki turaqtylyqty nyǵaıta berý kerek. Ol otbasy, oshaq qasyndaǵy keıbir usaq-túıek máselege «Bas jarylsa bórik ishinde, qol synsa jeń ishinde» degen ustanymmen kóz juma qaraýǵa májbúrleıdi. Óıtkeni, árdaıym, ásirese, geosaıası shıelenister asqynǵan kezde eldiń múddesi birinshi orynda turýy kerek, – deıdi Amangeldi Qurmetuly.
Sonymen birge, ol qazaq dıplomatııasyn úzdik dep baǵalaıtynyn atap ótti.
Aıta keteıik, buǵan deıin Tramp Sı Tszınpınnen Iranǵa qarý satpaýyn ótingenin jazǵanbyz.
