Qazirgi El-Nıno tarıhtaǵy eń kúshti qubylystardyń birine aınalýy múmkin
ASTANA. KAZINFORM – Tynyq muhıtynda qalyptasyp kele jatqan El-Nıno baqylaý tarıhyndaǵy eń kúshti qubylystardyń birine aınalýy múmkin. Mundaı eskertýdi Ulybrıtanııanyń Meteorologııalyq qyzmeti (Met Office) jasady, dep habarlaıdy Anadolý.
Met Office málimetinshe, kúsheıip kele jatqan El-Nıno jahandyq temperatýranyń kóterilýine yqpal etip otyr.
Boljam boıynsha, XIX ǵasyrdan bergi eń aýqymdy qubylystardyń birine aınalýy yqtımal El-Nıno 2027 jyly álemde temperatýranyń rekordtyq kórsetkishterge jetýine sebep bolýy múmkin.
Met Office-tiń uzaqmerzimdi boljamdar bóliminiń basshysy Adam Skaıf qalyptasyp kele jatqan El-Nınony «buryn-sońdy bolmaǵan qubylys» dep sıpattady. Onyń aıtýynsha, boljamdarda El-Nınonyń munshalyqty kúshti belgisi buryn baıqalmaǵan.
Sondaı-aq El-Nıno saldarynan bolatyn qurǵaqshylyq, sý tasqyny men aptap ystyq aıtarlyqtaı ekonomıkalyq shyǵyn ákelýi múmkin.
Eske sala ketsek, BUU El-Nıno saldarynan taǵy 49 mln adam azyq-túlik tapshylyǵyna ushyraýy múmkin ekenin málimdedi.
