«Ordabasy» men «Qyzyljar» Qazaqstan kýbogynyń shırek fınalyna shyqty

ASTANA. KAZINFORM - «Ordabasy» men «Qyzyljar» fýtboldan Qazaqstan kýbogynyń shırek fınalyna joldama aldy. 

Búgin shymkenttik «Ordabasy» syrt alańda «Taraz» komandasymen kezdesti.

Birinshi lıgada dop tebetin tarazdyq klýbynyń fýtbolshylary jaqsy oıynymen kózge tústi. Negizinen jergilikti fýtbolshylardan jasaqtalǵan ujym «Ordabasynyń» tájirıbeli oıynshylarynyń emin-erkin kósilýine múmkindik bergen joq. Keıbir sátterde gol soǵýǵa jaqyn boldy. Soǵan qaramastan shymkenttik komanda sapynan Rejınaldý 36, Erkebulan Tuńǵyshbaev 37-mınýtta gol soǵyp, komandasyn jeńiske jeteledi. Osylaısha «Ordabasy» qarsylasyn 2:0 esebimen jeńip, shırek fınalǵa shyqty.

Taǵy bir kezdesýde Petropavldyń «Qyzyljary» syrt alańda Shymkenttiń «Ońtústik akademııa» klýbymen sheberlik baıqasty. Alań ıeleri sapynan Dıas Donbaı 27-mınýtta gol soqsa, petropavldyq klýbtan Mádı Haseıin 70, Rýben Brıdjıdo 71-mınýtta kózge túsip, komandasyn esepte alǵa shyǵardy. Qarsylasynan 2:1 esebimen basym túsken «Qyzyljar» jarysty jalǵastyrýǵa múmkindik aldy.

Eske salsaq, budan buryn Qazaqstan kýbogy aıasynda «Tobyl» «Qaısardy», «Qaırat» «Turandy» 3:0 , «Atyraý» SD Family klýbyn 6:0, «Astana» «Jeńisti» 1:0 esebimen jeńdi.