Qazir jańa salmaqqa beıimdelip jatyrmyn – boksshy Tórehan Sabyrhan

ASTANA. KAZINFORM – 30 maýsymda elordada bokstan álem kýbogynyń kezekti kezeńi bastalady. Soǵan baılanysty ulttyq quramanyń jas sportshylarynyń biri Tórehan Sabyrhan Olympic.kz saıtyna bergen suhbatynda ne úshin jarysqa qatyspaıtynyn aıtyp, aldaǵy jospary týraly aıtty. 

Boksshy qazir jańa salmaqqa beıimdelip jatqanyn atap ótti.

– Daıyndyq óte joǵary deńgeıde ótip jatyr. Oqý-jattyǵý jıyny bastalǵan sátten-aq AQSh quramasynyń sportshylary kelip, birlesip jattyǵýdamyz. Bir-birimizben tájirıbe almasyp, paıdaly dúnıelerdi úırenip jatyrmyz. Qazir ózimniń salmaǵymdy 67-den 70 kelige kóterip, jańa salmaqqa beıimdelý ústindemin. Alda U22 Azııa chempıonaty ótedi, sol dodaǵa qatysýǵa múmkindik týyp qalýy múmkin. Aldaǵy jarysqa men qatyspaımyn. Bul joly 70 keli salmaq dárejesinde Abylaıhan aǵamyz baq synaıdy. Abylaıhan aǵanyń bul salmaqtaǵy tájirıbesi mol. Sondyqtan bapkerler shtaby dál osy jarysqa ony shyǵarýdy jón dep tapty. Árıne, bapkerdiń sheshimi - biz úshin zań. Ázirge men osy salmaq dárejesinde ekinshi nómirli sportshymyn, - dep bólisti sportshy.

Aıta keteıik, Astanada ótetin álem kýbogynda 30 memlekettiń boksshylary baq synaıdy.

Mońǵolııa eliniń boksshylary Astanaǵa at basyn burdy.