Qazir ulyń úıde, qylyǵy áleýmettik jelide — Nurlan Baıjigituly
ASTANA. KAZINFORM — Balanyń tárbıesi men onyń áleýmettik jelidegi qaýipsizdigine eń aldymen ata-ananyń ózi jaýapty. Ata-ana balasyna qandaı úlgi kórsetse, bala da sony qabyldaıdy. Bul týraly ımam Nurlan Baıjigituly «BIZDIN ORTA» podkastynda aıtty.
Onyń pikirinshe, balanyń mýltfılm nemese telefon kórý máselesinen buryn ata-ananyń ózara qarym-qatynasyna nazar aýdarý qajet.
— Men balalardan buryn ata-analarǵa nazar aýdarǵym keledi. Ata-ananyń ózine tárbıe kerek. Áıteýir bala tynysh otyrsa boldy dep, anasy bir telefonǵa telmirip, ákesi ekinshi telefonǵa úńilip, bir-biriniń júzin kórmeı, sóılespeı otyrsa, bala qaıda barady? Sondyqtan aldymen eki ata-ananyń arasyndaǵy qarym-qatynas rettelýi kerek, — dedi Nurlan Baıjigituly.
Imam ata-ananyń balamen birge ýaqyt ótkizýi, tabıǵatqa shyǵýy jáne qarapaıym qoǵamdyq isterge birge aralasýy onyń tárbıesine oń áser etetinin aıtty.
— Mindetti túrde memleket jarııalap, senbilikke shyǵamyz deýdiń qajeti joq. Qolyńyzǵa bir paket alyp, balańyzben birge mańaıdaǵy qoqysty jınap shyqsańyz bolady. Qol ustasyp, tabıǵatta serýendep qaıtyńyz. Balaǵa osyndaı qarapaıym dúnıeler arqyly tárbıe beriledi, — dedi ol.
Onyń aıtýynsha, qoǵamdaǵy tazalyq máselesine de ata-ananyń jeke úlgisi arqyly yqpal etýge bolady.
— Biz keıde tazalyq mekemelerine renjımiz. Biraq bir sóz esime túsedi: «Tazalyq — shashpaǵan jerde bolady». Sondyqtan ózimizden bastaýymyz kerek. Dál sol sııaqty gadjet máselesinde de ata-ana balasyna ózi úlgi bolýy qajet, — dedi Nurlan Baıjigituly.
Imam ata-analar balasynyń áleýmettik jelidegi belsendiligine de nazar aýdarýy kerek ekenin aıtty.
— Buryn «ulyń úıde qylyǵy túzde» degen sóz bar edi. Qazir «ulyńnyń qylyǵy áleýmettik jelide, telefonynda» deýge bolady. Balanyń qandaı paraqshalarǵa kirip júrgenin, kimdermen aralasatynyn ata-ana bilýi kerek. Ata-ana balaǵa jaqsy dos taýyp berýge, endi qazirgi zamandaǵy dos — áleýmettik jeli. Sondyqtan balanyń kimmen aralasatynyna, neni kóretinine kóńil bólý mańyzdy, — dedi ol.
Nurlan Baıjigituly áleýmettik jelidegi keıbir beınematerıaldardyń bala psıhologııasyna keri áser etýi múmkin ekenin aıtyp, ata-analardy saq bolýǵa shaqyrdy.
— Keıde kishkentaı balalardyń, qyzdardyń áleýmettik jelige bı bılep vıdeo túsirip jatqanyn kóremiz. Bir qaraǵanda zııany joq, zamanaýı dúnıe sııaqty kórinedi. Biraq keıbir qımyldary shekten shyǵyp ketýi múmkin. Ony ata-anasy kórip, «balam tanymal bolyp jatyr» dep qýanady. Al sol beıneniń bir fragmentin qıyp alyp, teris maqsatta paıdalanatyn adamdar bar. Sondyqtan óte saq bolý kerek, — dep túıindedi ımam.
Aıta keteıik, Tarazda bala tárbıesine salǵyrt qaraǵan anaǵa 64 myń teńge aıyppul salyndy.
