Qazir strımıng arqyly saýda jasaý suranysqa ıe – mınıstr

ASTANA. KAZINFORM – Saýda jáne ıntegratsııa mınıstri Arman Shaqqalıev elimizde elektrondy saýdanyń qarqyndy damyp kele jatqanyn aıtty.

- Elektrondyq saýda – álemdik ekonomıkanyń eń qarqyndy damyp kele jatqan segmentteriniń biri. Búginde álem halqynyń 30 paıyzy ınternet arqyly onlaın saýda jasaıdy. 2024 jyly jahandyq elektrondyq kommertsııa naryǵynyń jalpy kólemi shamamen 6,3 trıllıon AQSh dollaryn qurap, onyń ishinde elektrondyq saýdanyń úlesi 20% paıyz boldy. Aldaǵy jyldary elektrondyq kommertsııanyń kólemi 8,3 trıllıonǵa deıin ósedi dep boljanyp otyr, - dedi Arman Shaqqalıev Úkimet otyrysynda.

Mınıstrdiń aıtýynsha, qazir saýda qurylymy qarqyndy ózgerip jatyr.

- Qazir elektrondy saýdada jasandy ıntellekt tehnologııalaryn engizý, derbestendirý, áleýmettik jeliler arqyly saýdanyń ósýi, strımıngter (tikeleı efır) arqyly saýda jasaý suranysqa ıe. Sonymen qatar, kompanııalardyń áleýmettik jaýapkershiligi artyp, ekologııalyq taza ónimderge suranys artyp jatyr, - deıdi ol.

Eske sala keteıik, sońǵy eki jylda elektrondy saýdadaǵy shaǵymdar 290%-ǵa ósken. Qazir Májilis jańa zań redaktsııasyn qarap jatyr.