Qazir Ózbekstanǵa jumys izdep aǵylǵan qazaqstandyqtar da kóp – Elshi
ASTANA. KAZINFORM – Qazaqstannyń Ózbekstandaǵy Tótenshe jáne ókiletti elshisi Beıbit Atamqulov Ózbekstan men Qazaqstan arasyndaǵy eńbek mıgratsııasy ekijaqty sıpat alǵanyn aıtady. Qazaqstan-Ózbek iskerlik keńesiniń jıynynda sóz alǵan dıplomat eki eldiń bıligine aradaǵy barys-kelisti jeńildetýdi usyndy.
«ІT-sektordan mashına qurastyrýǵa deıingi joǵary biliktilikti qajet etetin túrli salalarda jumys kúshi men mamandar tartý eki aradaǵy áriptestiktiń mańyzdy qyry bolyp esepteledi. Bizge jumys isteýge ruqsat berý úderisterin, ózge de ákimshilik retteý tetikterin jeńildetip, eki eldiń de azamattaryna birdeı múmkindik usyný qajet. Mundaı tásil jumys kúshi men kásipkerlerdiń qozǵalysyn jeńildetip qana qoımaı, tájirıbe, bilim, tehnologııa almasýǵa qolaıly jaǵdaı týǵyzady», - dedi ol.
Elshi buǵan deıin Qazaqstanǵa jumys izdep aǵylǵan ózbek aǵaıyndar kóp bolsa, qazir Ózbekstanǵa jumys izdep baratyn qazaqstandyqtardyń sany artyp kele jatqanyn aıtady.
«Men Tashkentte júrgende ylǵı kóremin, búginde Ózbekstan ekonomıkasynyń túrli salasynda qazaqstandyq mamandar qatty suranysqa ıe. Negizinen bul jeke sektor, bıznes. ІT-saladan bastap iri metallýrgııalyq kásiporyndarda, tsement óndirisi men qarjy sektorynda qazaqstandyq top-menedjerler men orta býyndy menedjerler óte kóp. Ekijaqty qozǵalys dep otyrǵanym sol. Qazir tek ózbekstandyqtar ǵana Qazaqstanǵa aǵylyp jatqan joq. Ózbekstanǵa aǵylyp jatqan qazaqstandyq mamandardyń da úlken aǵynyn baıqap otyrmyz. Onyń ishinde iri kásiporyndarda tıisti biliktilik alǵan qarapaıym jumysshylar da bar», - dedi Beıbit Atamqulov.
