Qazir qorqynyshtan qaltyrap otyratyn emes, naqty jumys isteıtin zaman – Memleket basshysy

ASTANA. KAZINFORM – Búgin Úkimettiń keńeıtilgen otyrysynda Memleket basshysy Qasym-Jomart Toqaev Alataý qalasyna qatysty tapsyrma berdi.

- Jedel damý jolyna túsken Alataý qalasy jańa ınvestıtsııalyq kezeńniń negizgi jobasy bolýǵa tıis. Bul – Smart City qaǵıdatyna sáıkes barlyq salaǵa ozyq ınnovatsııalar engizý, jasandy ıntellekti men tsıfrlyq tehnologııany qoldaný degen sóz, - dedi Qasym-Jomart Toqaev.

Prezıdenttiń aıtýynsha, onda kapıtal tartý úshin teńdesi joq jaǵdaı jasalyp, jańa, batyl sheshimder qabyldaýǵa múmkindik beretin úzdik retteý rejımin qalyptastyrý qajet.

- Osy mańyzdy másele boıynsha meniń tapsyrmammen Konstıtýtsııalyq zań ázirlenip, Parlamenttiń qaraýyna usynyldy. Maǵan Ulttyq bank pen Qarjylyq monıtorıng agenttigi buǵan qarsylyq tanytqany týraly baıandaldy. Bul Konstıtýtsııalyq zań qabyldaýǵa múmkindik bermeıdi. Alaıda meniń tóraǵalyǵymmen ótken jıynda mundaı pikir aıtylmaǵan edi. Eger sizderde qandaıda bir qaýip ne qarsylyq bolsa, maǵan qaǵaz júzinde usynys berińizder. Tıisti tapsyrma beremin. Biraq, meniń oıymsha, bul shyndyqqa janaspaıtyn bos áńgime sekildi. Men jaýapkershilik alýdan qashpaımyn, al sizder konferentsııalarda dilmársip, sóz sóılep júre berińizder. Qazir qorqynyshtan qaltyrap otyratyn emes, naqty jumys isteıtin zaman. Bul – elimiz úshin biregeı joba. Sondyqtan Úkimet onyń basy artyq bıýrokratııasyz, kidirissiz ári sapaly damýyn qamtamasyz etýi kerek, - dedi Memleket basshysy.

Budan buryn habarlanǵandaı, Prezıdent Ata Zańymyzǵa qatysty túpkilikti sheshim jalpyulttyq referendýmda qabyldanatynyn málim etti.