Qazir elimizde neshe zeınetker bar
ASTANA. KAZINFORM – 2026 jylǵy 1 aqpandaǵy jaǵdaı boıynsha Qazaqstandaǵy zeınetkerler sany 2 mln 538 myń adamdy qurady. Jyl basynan beri olarǵa respýblıkalyq bıýdjetten 395,2 mlrd teńge kóleminde zeınetaqy tólendi.
Eńbek jáne halyqty áleýmettik qorǵaý mınıstrliginiń málimetinshe, atalǵan somanyń 131,3 mlrd teńgesi – bazalyq zeınetaqyǵa, al 263,9 mlrd teńgesi – yntymaqty zeınetaqy tólemderine baǵyttalǵan.
Osy kúnge jıyntyq zeınetaqynyń ortasha mólsheri 157 843 teńge boldy. Onyń ishinde yntymaqty zeınetaqynyń ortasha mólsheri – 103 931 teńge, al bazalyq zeınetaqy – 53 912 teńge.
Mınıstrlik eske salǵandaı, 2018 jylǵy 1 shildeden bastap memlekettik bazalyq zeınetaqy tólemi zeınetaqy júıesindegi eńbek ótili eskerile otyryp, ár alýshyǵa jeke taǵaıyndalady.
Bul rette 1998 jylǵy 1 qańtardaǵy jaǵdaı boıynsha yntymaqty júıede jumys istegen kezeń, sondaı-aq mindetti zeınetaqy jarnalary tólengen ýaqyt zeınetaqy júıesindegi eńbek ótiline engiziledi.
- Eger azamattyń zeınetaqy júıesindegi ótili 10 jyl nemese odan az bolsa, ne múlde bolmasa, bazalyq zeınetaqy eń tómengi kúnkóris deńgeıiniń 70 paıyzy mólsherinde belgilenedi. 10 jyldan asqan ár jyl úshin onyń mólsheri 2 paıyzǵa ulǵaıady. Máselen, eńbek ótili 20 jyl bolsa, bazalyq zeınetaqy kúnkóris deńgeıiniń 90 paıyzyn quraıdy. Al eńbek ótili 34 jyl jáne odan kóp bolǵan jaǵdaıda tólem kúnkóris deńgeıiniń 118 paıyzyna deıin jetedi.
Eger bir aı ishinde mindetti zeınetaqy jarnalary Biryńǵaı jınaqtaýshy zeınetaqy qoryna birneshe ret aýdarylsa, jınaqtaýshy júıege qatysý merzimi bir aı retinde esepteledi, - delingen aqparatta.
Mınıstrlik túsindirgendeı, mindetti zeınetaqy jarnalary neǵurlym turaqty ári tolyq kólemde aýdarylsa, zeınet jasyna jetken kezde bazalyq zeınetaqy mólsheri soǵurlym joǵary bolady.
Al jasyna baılanysty zeınetaqy tólemderiniń mólsheri 1998 jylǵy 1 qańtarǵa deıingi jumys ótiline (keminde 6 aı bolýy tıis) jáne zeınetke shyqqanǵa deıingi kezeńdegi ortasha aılyq tabysqa baılanysty aıqyndalady.
Aıta keteıik, buǵan deıin jasyna baılanysty BJZQ-dan zeınetaqy tólemderin qashan rásimdeý qajet ekeni habarlandy.