Qazir feldsherlerdiń eń tómengi jalaqysynyń mólsheri qandaı

ASTANA. KAZINFORM — Densaýlyq saqtaý birinshi vıtse-mınıstri Tımýr Sultanǵazıev medıtsına qyzmetkerleriniń jalaqysyn kóterýge qatysty pikir bildirdi.

— Qazir Densaýlyq saqtaý mınıstrligi Úkimet múshelerimen birlese jalaqyny kóterý máselesin pysyqtap jatyr. 2020-2023 jyldary dárigerlerge 30 paıyzǵa, orta býyn medıtsına qyzmetkerlerine jalaqy 20 paıyzǵa óskenin atap ótkim keledi. Al medıtsınalyq emes qyzmetkerlerdiń, onyń ishinde jedel járdem júrgizýshileriniń jalaqysy 2024 jylǵa deıin 18%-ǵa ósti. Qazir bul másele boıynsha jumystar talqylanyp jatyr, ıaǵnı tıisti esepteýler de daıyndaldy. Meniń oıymsha, Úkimet qoldasa, keler jyldan bastap jalaqyny kóterýdi josparlap otyrmyz, — dedi T. Sultanǵazıev Senattyń jalpy otyrysynan keıin.

Onyń aıtýynsha, Úkimet qaýlysyna sáıkes, qazir feldsherlerdiń eń tómengi jalaqysy shamamen 180-190 myń teńge, al eńbek ótiline qaraı 260 myń teńgege deıin jetedi. Júrgizýshiler 160-180 myń teńge alyp júr.

— Aldaǵy ýaqytta jalaqy qanshalyqty ósetinin naqty aıtý erte. Qazir Qarjy mınıstrligimen naqty kólemdi talqylap jatyrmyz, — dedi vıtse-mınıstr.

Budan buryn habarlanǵandaı, Tımýr Sultanǵazıev kelesi jyly feldsherlerdiń jalaqysyn kóterý úshin qosymsha 10 mlrd teńgedeı qarajat kerek ekenin aıtqan edi.