Qazir eńbek kitapshasy qajet pe
ASTANA. KAZINFORM – Eńbek kitapshasy burynǵydaı mindetti emes. Bul týraly Qazaqstan Respýblıkasy Eńbek jáne halyqty áleýmettik qorǵaý mınıstrliginiń mamany Jibek Joly telearnasynyń “Búgin LIVE” baǵdarlamasyna bergen suhbatynda málimdedi.
– Eńbek kitapshasy Eńbek kodeksiniń 35-babyna sáıkes, eńbek ótilin rastaıtyn qujattardyń biri. Biraq ol burynǵydaı mindetti emes. Qazir eńbek kitapshalary elektrondy júıege kóship jatyr. Qujattardy tsıfrlandyrý úshin jaýapty mınıstrlik pen ózge de memlekettik mekemeler atqaryp jatqan jumystar qarqyndy, – deıdi Ashat Jumaly.
Alaıda bul qujat keı azamattarǵa qajet bolyp qalýy da múmkin.
– Dese de, eńbek kitapshasyn kerek emes dep laqtyryp tastaýǵa bolmaıdy. Bul 90-shy, 2000-shy jyldary jumys istegen azamattarǵa kerek bolyp qalýy múmkin. Oǵan qosa, zeınetaqy mólsheri BJZQ derekteri men elektrondy eńbek bırjasyndaǵy málimetterge sáıkes esepteledi. Al onda keı málimetter bolmasa, azamattar eńbek kitapshasy arqyly óz eńbek ótilin rastaýǵa quqyly, – deıdi memlekettik eńbek ınspektsııasy komıtetiniń bas sarapshysy.
Maman derekterdi tsıfrlandyrýdaǵy basty máselege de toqtaldy.
– Negizgi málimetter elektrondyq eńbek bırjasyna tirkelýi kerek. Qazirgi ýaqytta qujattardy tsıfrlandyrýdaǵy eń basty másele – jumys berýshilerdiń elektrondy eńbek bırjasyna tirkemeýi. Sol sebepti qazir Eńbek kodeksiniń 23-babyna sáıkes, eńbek ótilin elektrondy eńbek bırjasyna tirkeý mindetteldi. Jaýapkershilik jónindegi jumystar aldaǵy ýaqytta jalǵasady.
Aıta keteıik, endi endi eńbek shartyn bes mınýt ishinde onlaın rásimdeýge bolady.