«Qazir eń úlken motıvatsııa – otbasym»: Ábıba Ábýjaqynova Azııa oıyndaryna qalaı daıyndalyp jatqanyn aıtty
ASTANA. KAZINFORM - Dzıýdodan Qazaqstan áıelder quramasynyń kóshbasshylarynyń biri Ábıba Ábýjaqynova jaraqatynan tolyq aıyǵyp, endi Azııa oıyndarynan júldeli oralýdy kózdep otyr. Osy rette INFORMSPORTS tilshisi mańyzdy jarys aldynda sportshymen suhbattasyp qaıtty.
– Ábıba, bıyl jaraqat alyp, biraz jarystan tys qalǵanyńyzdy bilemiz. Qazir jaǵdaıyńyz qalaı? Tolyq qalpyńyzǵa kele aldyńyz ba?
– Iá, qazir tolyqqandy jattyǵý protsesine qaıta oraldym. Jaraqat burynǵydaı mazalamaıdy. Alǵashqy kezeńde dárigerler men bapkerlerdiń barlyq keńesin muqııat oryndap, saqtyqpen jumys istedik. Qazir ózimdi jaqsy sezinemin.
Barlyq nazarym Azııa oıyndaryna aýǵan. Qazir men úshin eń mańyzdysy – sol jarysqa tyńǵylyqty daıyndalý. Sondyqtan jaraqatty ótken kezeń retinde qabyldap, aldaǵy dodaǵa bar kúshimdi salyp jatyrmyn.
– Úlken sportqa jaraqattan keıin qaıta oralý psıhologııalyq turǵydan qıynǵa soqty ma?
– Meniń oıymsha, eń bastysy – psıhologııalyq daıyndyq. Jaraqat alǵannan keıin kóptegen sportshyda sol qozǵalysty qaıta jasaýǵa degen qorqynysh paıda bolady. Biraq kásibı sportta mundaı sezimge boı aldyrýǵa bolmaıdy.
Ózim aldyma naqty maqsat qoıdym. Sol maqsatqa jetýge degen umtylys barlyq kúmánnen áldeqaıda kúshti boldy. Sondyqtan jumysty toqtatpaı, daıyndyqty jalǵastyryp kelemin.
– Azııa oıyndaryna daıyndyq qalaı ótip jatyr? Bul jarysqa qandaı maqsatpen barasyz?
– Daıyndyq josparǵa saı júrip jatyr. Jyl boıy oqý-jattyǵý jıyndaryndamyz. Barlyq jumysymyz osy mańyzdy dodaǵa baǵyttalǵan.
Ár sportshy tórt jyldyq tsıklge belgili bir maqsatpen keledi. Bizdiń maqsatymyz da aıqyn – altyn medal jeńip alý. Azııa oıyndaryna qatysý úshin emes, jeńis úshin baramyz. Sondyqtan árbir jattyǵýdyń jaýapkershiligi óte joǵary.
– Qazir ulttyq quramada sporttyq analıtıka men beınetaldaýdyń róli qandaı?
– Qazir bul daıyndyqtyń ajyramas bóligine aınaldy. Bapkerlermen birge qarsylastarymyzdyń beldesýlerin turaqty túrde qarap, olardyń ádis-tásilderin, kúshti jáne álsiz tustaryn zertteımiz.
Men buǵan deıin de osylaı daıyndalatynmyn. Beınetaldaý jarys kezinde túrli jaǵdaıǵa daıyn bolýǵa kómektesedi jáne óz-ózińe degen senimdilikti arttyrady.
– Áleýmettik jeliler sportshy úshin múmkindik pe álde artyq qysym ba?
– Men áleýmettik jelilerde kóp ýaqyt ótkizbeımin. Bos ýaqytym bolsa ǵana paraqshalaryma kirip, qajet kezde jazba jarııalaımyn.
Árıne, áleýmettik jeli jankúıerlermen baılanys ornatýǵa múmkindik beredi. Biraq onyń da óz shegi bolýy kerek. Men úshin eń mańyzdysy – jattyǵý protsesi. Sondyqtan ýaqytymnyń basym bóligin sportqa arnaımyn.
– Qazaqstandaǵy sportty tsıfrlandyrý deńgeıine qandaı baǵa berer edińiz?
– Óz tájirıbeme súıenip aıtsam, qazirgi júıege kóńilim tolady. Biz jyl boıy oqý-jattyǵý jıyndarynda júremiz. Ómirimniń shamamen 95 paıyzy sol jıyndarda ótedi. Qazaqstanda ǵana emes, shetelde de jıi daıyndalyp, halyqaralyq tájirıbe jınaqtaımyz.
Qazirgi tańda daıyndyq júıeli uıymdastyrylǵan. Árıne, kez kelgen salany damytýǵa bolady. Biraq óz sportym turǵysynan qazirgi jumysqa oń baǵa beremin.
– Jeke ómir men kásibı sporttyń tepe-teńdigin saqtaý qıyn emes pe?
– Joq, maǵan qıyn emes. Sebebi joldasymnyń ózi de buryn kásibı dzıýdomen aınalysqan. Ol sportshynyń qandaı daıyndyqtan ótetinin, jarys aldyndaǵy jaýapkershilikti jaqsy túsinedi.
Sondyqtan árdaıym qoldaý kórsetedi. Osyndaı túsinistik kásibı sport pen otbasylyq ómirdi qatar alyp júrýge kóp kómektesedi.
– Búginde sizge eń úlken motıvatsııa ne beredi?
– Qazir men úshin eń úlken motıvatsııa – otbasym. Sonymen qatar burynǵy jetistikterimmen shektelmeı, odan da bıik belesterdi baǵyndyrǵym keledi.
Ár jarysta ózimdi burynǵydan myqtyraq kórsetýge tyrysamyn. Sportshy úshin damý eshqashan toqtamaýy kerek. Sondyqtan kún saıyn ózime jańa talap qoıamyn.
– Jaqynda turmys qurdyńyz. Kúzde toı bolady degen aqparat bar. Daıyndyq qalaı júrip jatyr?
– Iá, toıdy kúzde ótkizýdi josparlap otyrmyz. Biraq ázirge oǵan arnaıy daıyndalyp jatqan joqpyz. Sebebi aldymyzda óte mańyzdy jarystar tur.
Qazir bar nazarymyz Azııa oıyndaryna aýǵan. Sol jarystar aıaqtalǵannan keıin ǵana toıǵa qatysty josparlarymyzǵa qaıta oralamyz.
