Qazir elde 112 jańa preparat tirkelip jatyr
ASTANA. KAZINFORM — Jańa dárilerdiń qaýipsizdigine qoıylatyn talaptar tolyq kólemde oryndalýy tıis. Bul týraly Úkimet otyrysynda Premer-mınıstr Oljas Bektenov málim etti.
— Jańadan shyǵyp jatqan dárilik zattardyń qoljetimdi bolýy — aıryqsha mán beretin másele. Ónim álemniń damyǵan elderinde sertıfıkattalǵan jaǵdaıda, ony memlekettiń bastamasymen jedel tirkeý múmkindigi zańnamalyq turǵydan qarastyrylǵan. Qazirgi ýaqytta osyndaı 112 jańa preparatty tirkeý jumystary júrgizilip jatyr. Densaýlyq saqtaý mınıstrligi men «SQ-Farmatsııa» kompanııasy emdelýshilerdiń qajettilikterin eskere otyryp ári dárilik zattardyń basymdyǵyn aıqyndap, atalǵan tetikti jedel iske asyrýy qajet. Bul rette jańa dárilerdiń qaýipsizdigine qoıylatyn talaptar tolyq kólemde saqtalýǵa tıis, — dedi Oljas Bektenov.
Onyń aıtýynsha, Densaýlyq saqtaý mınıstrligi Qazaqstandy farmatsevtıkalyq júıesi jetilgen el retinde joǵary deńgeıge shyǵarýǵa múmkindik beretin zerthanalyq keshen qurý máselesin jedeldetýi qajet.
— Medıtsınalyq buıymdardy satyp alý tásilderin de jetildirý kerek. Bıyl biryńǵaı dıstrıbıýtor 38 mlrd teńgeden astam somaǵa ártúrli medıtsınalyq zattardy satyp alǵan. Bıýdjet shyǵyndaryn azaıtý úshin baǵalar men sıpattamalardy jáne quramdas bólikterdi muqııat salystyrý qajet. Biraq qarajatty únemdeýge emdeý sapasyn buljytpaı saqtaı otyryp qol jetkizý kerek. Jalpy, qabyldanyp jatqan barlyq sharalar dári tapshylyǵyn múldem joıyp, medıtsınalyq qyzmetterdiń qoljetimdiligin arttyrýǵa tıis. Ol úshin otandyq farmatsevtıkalyq óndiristi damytý jáne satyp alý júıesin jetildirý máselelerine keshendi túrde qaraý qajet, — dedi Úkimet basshysy.
Buǵan deıin habarlanǵandaı, Premer-mınıstr halyqty tegin dárimen qamtamasyz etý júıesine qatysty tapsyrma berdi.
