«Qazir de qırap jatyr»: Feldsher qaza tapqan úı turǵyndary alańdaýly
ASTANA. KAZINFORM — Astanada feldsher Uldana Myrzýannyń qazasyna qatysty sot otyrysy jalǵasyp jatyr. Sotta kýáger, qasbet qulaǵan úı turǵyny Marına Samsonova jaýap berip, úı shatyryndaǵy máseleler, ǵımarattyń qasbet qulaǵansha jáne qulaǵannan keıingi jaǵdaıy, sondaı-aq keıin júrgizilgen saraptama nátıjeleri týraly aıtyp berdi.
Kýágerdiń aıtýynsha, úıdiń shatyryndaǵy máseleler birneshe jyl buryn paıda bolǵan. Tipti 2014 jyly ol páterin sý basýyna baılanysty burynǵy KSK tóraǵasyna qarsy sotqa talap aryz bergen.
Marına Samsonova birinshi kireberistiń toǵyzynshy qabatynda turady. Onyń aıtýynsha, 2025 jylǵy 8 qarashadaǵy qasbet qulaǵannan keıin úıdiń jekelegen bólikterin kúsheıtý jumystary júrgizilgen. Alaıda keıin qabyrǵalarda jańa jaryqtar paıda bolǵan.
— Qazirgi tańda úıdiń jaǵdaıyna alańdaımyz, qaýipsizdigine qorqamyz. Qazir toǵyzynshy qabattaǵy jaryqtar ulǵaıyp, tómen qaraı taralyp jatyr. Jaryqtardyń dınamıkasyn baqylaý úshin arnaıy qurylǵylar ornatylǵan, — dedi kýáger.
Kýáger qasbet qulaǵannan keıin júrgizilgen saraptama nátıjesine de toqtaldy. Onyń aıtýynsha, 2026 jylǵy 26 aqpandaǵy qorytyndyda úı apat aldyndaǵy jaǵdaıda dep tanylyp, oǵan tórtinshi dáreje berilgen.
— Men bul úıde 20 jyldan astam ýaqyt turamyn. Qabyrǵanyń kez kelgen sátte qulaýy múmkin ekenin bilmedim. Saraptama qorytyndysynda kirpish qalaýyndaǵy aqaý, qalaý kezinde armatýralyq tordyń bolmaýy jáne tıisti bekitýdiń jasalmaǵany kórsetilgen, — dedi Marına Samsonova.
Kýágerdiń aıtýynsha, qasbet qulaǵannan keıin turǵyndar jańa oqıǵanyń aldyn alý úshin memlekettik organdarǵa ujymdyq ótinishter joldap keledi. Turǵyndardy ásirese úı mańyndaǵy balalar alańynyń qaýipsizdigi alańdatady.
— Budan ári de qulaý bolady ma dep qorqamyz. Úıdiń janynda balalar alańy bar. Eger kirpishter qulaıtyn bolsa, taǵy adamdar qaza bolýy múmkin, — dedi ol.
Buǵan deıin aıyptalýshy Sáýle Jubanııazovaǵa deıin Páter ıeleri kooperatıvin basqarǵan Gúljaýhar Ahmetovadan jaýap alynǵan edi.
Feldsher óliminen keıin TJD bólimshe komandıriniń qyzmeti tómendegen.
