Qazir belsendi túrde bás tigip júrgen 350 myń adam bar - Ǵalymjan Mustafaev
ASTANA. KAZINFORM – Qazir býkmekerler men kazınolarda 350 myń belsendi akkaýnt bar. Bul týraly Kazinform-nyń YouTube arnasyndaǵy Bızdıñ orta podkastynda Týrızm jáne sport mınıstrligi Oıyn bıznesin jáne lotereıany retteý komıteti tóraǵasynyń orynbasary mindetin atqarýshy Ǵalymjan Mustafaev málim etti.
- Tirkelgen býkmekerlik keńseler bolsa, olarǵa qatysty memleket tarapynan zertteý iske asyrylady. Al tirkelmegen ári lıtsenzııasy joq býkmekerlerde neshe adam aqsha salǵanyn, bás tigý somasyn anyqtaý qıyn, - dedi Ǵ. Mustafaev.
Býkmekerlik keńselerdiń múddesin qorǵaıtyn arnaıy qaýymdastyq bar. Olarmen bekitilgen tıisti memorandým aıasynda mınıstrlik ókilderi byltyr aqparat suratqan.
- Búginde býkmekerlik keńselerde 2 mln-ǵa jýyq akkaýnt bar. Onyń ishinde 300 myńy belsendi akkaýnt sanalady. Sondaı-aq kazınolarda da 450 myńǵa tarta tirkelgen akkaýnt bolsa, qazir sonyń 50 myńy belsendi, - dedi vedomstvo ókili.
Aıta keteıik, Qazaqstanda ózin qumar oıyndardan shektegender 170 myńnan asty. Degenmen, bul adamdar arasynda ózin shektegenimen, keıinnen jaqyn týystary atynan akkaýnt ashyp alǵandar anyqtalyp jatyr.
Eske salsaq, Shilde aıynda Memleket basshysy «Qazaqstan Respýblıkasynyń keıbir zańnamalyq aktilerine oıyn bıznesi, lotereıa qyzmeti, densaýlyq saqtaý, memlekettik eńbek ınspektsııasy, memlekettik baqylaý jáne artyq zańnamalyq reglamentteýdi bolǵyzbaý máseleleri boıynsha ózgerister men tolyqtyrýlar engizý týraly» Zańyna qol qoıdy.
Zań arqyly halyqtyń oıynǵa táýeldiligin tómendetýge baǵyttalǵan shekteýshi jáne yntalandyrýshy normalar engiziledi.
Memlekettik keńesshi Erlan Qarın búgin qabyldanǵan oıyn bıznesi máseleleri týraly jańa zańǵa qatysty pikirin bildirdi.
Qumar oıyndarǵa táýeldi adamdardy medıtsınalyq ońaltýdyń tártibi belgilendi. Mundaı adamdardy, qupııalylyqty saqtaı otyryp, aqyl-keńes berý arqyly baqylaýǵa alý tásili engizildi.
Budan buryn habarlanǵandaı, lýdomanııaǵa shaldyqqandardyń tek 8,3%-y qumar oıyndarǵa táýeldiligin moıyndaıdy eken.
Osy jyly daýryz aıynda Májilis depýtaty Elnur Beısenbaev elimizde 400 myńdaı adam býkmekerler men kazınolardyń turaqty klıentine aınalǵanyn aıtty.