Qazir azyq-túlik naryǵynda báseke kúsheıip keledi – Toqaev
ASTANA. KAZINFORM – Aýyl sharýashylyǵy qyzmetkerleriniń birinshi forýmynda Memleket basshysy Qasym-Jomart Toqaev Úkimetke dıqandardy elimizde óndirilgen tuqymmen qamtamasyz etýdi tapsyrdy.
«Qazir jahandyq azyq-túlik naryǵynda báseke kúsheıip keledi. Oǵan tótep berý úshin ǵylymdy damytýǵa basa mán berý kerek. Sonyń ishinde tuqym sharýashylyǵyn jandandyrý — strategııalyq mindettiń biri. Kartop pen qant qyzylshasy boıynsha otandyq tuqymnyń úlesi 10 paıyzǵa da jetpeıdi. Osyndaı máselelerdi shuǵyl sheshý qajet», — dedi Prezıdent.
Memleket basshysy bıyl Dándi-daqyldar selektsııasy men tuqym sharýashylyǵyn damytý týraly keshendi jospar qabyldanyp, naqty mindetter qoıylǵanyn basa aıtty.
«Úkimetke dıqandardy elimizde óndirilgen tuqymmen qamtamasyz etýdi tapsyramyn. Bul kórsetkishti 2028 jyly 80 paıyzǵa jetkizý qajet. Al joǵary sapaly (ıaǵnı, elıtalyq) tuqymnyń úlesi keminde 15 paıyz bolýy kerek. Ol úshin sheteldiń ozyq tájirıbesin zerttegen jón. Men jaqynda frantsýz kásipkerlerin osy saladaǵy ınvestıtsııalyq jobalardy birge júzege asyrýǵa shaqyrdym», — dedi Qasym-Jomart Toqaev.
