Qazir áleýmettik jeli arqyly halyqqa aqyl aıtatyndar kóbeıip ketti — Prezıdent

ASTANA.  KAZINFORM  —  Memleket basshysy Ǵylym jáne tehnologııalar jónindegi ulttyq keńestiń otyrysynda jurttyń qarjylyq, aqparattyq, tsıfrlyq jáne basqa da saladaǵy saýatyn arttyrý máselesin kóterdi. Bul týraly Aqordanyń baspasóz qyzmeti habarlady.  

— Ǵalymdar árdaıym jasampazdyq jarshysy bolýǵa tıis. Qazir áleýmettik jeli arqyly halyqqa aqyl aıtatyndar kóbeıip ketti. Olardyń arasynda jalǵan aqparat taratyp, jurtty adastyratyn adamdar az emes. Osyndaı sanasyz, pıǵyly aram adamdardyń teris yqpalyna túsip, keıbir jastar ǵalamtorda neshe túrli ósek nemese halyqty arandatýdy kózdeıtin materıaldar jaza bastady. Biraq osy jerde bir másele bar. Tıisti mekemeler zamanaýı tehnologııalardy paıdalana otyryp, osyndaı destrýktıvti jazbalardy jazatyn adamdardyń aty-jónin, turatyn jerin, bárin anyqtap alyp jatyr. Olar jas bolǵannan keıin ázirge túsindirý jumysy júrgizilýde. Biraq mundaı áreketter jalǵasa berse, tıisti mekemeler Zań men tártip tujyrymdamasyn oryndaý úshin basqa shara qoldanýǵa májbúr bolady. Mundaı sátte ǵalymdar únsiz qalmaýy kerek, jastar arasynda, jalpy qoǵamda jan-jaqty aǵartý jumysyn júrgizýi kerek. Úkimet pen ákimderdiń qyzmetinde olqylyq múldem joq dep eshkim aıtpaıdy, biraq olar týraly pikir aıtqan kezde halyqty arandatpaı, qoǵamdy shýlatpaı, salmaqty jáne sanaly pikir aıtý qajet. Elimizdiń turaqtylyǵy, bul — eń mańyzdy basymdyq. Kez kelgen másele jaıly qoǵamdyq pikir bilikti mamandardyń kózqarasy negizinde qalyptasýy kerek, — dedi Prezıdent.

Aıta keteıik, búgin Memleket basshysynyń qatysýymen Ǵylym jáne tehnologııalar jónindegi ulttyq keńes ótip jatyr.