Qazir AQSh-pen kelisimge kelýdiń eń qolaıly ýaqyty – Iran prezıdenti
ASTANA. KAZINFORM – Iran prezıdenti Masýd Pezeshkıan 8 tamyz, senbi kúni qazirgi kezeńdi AQSh-pen kelisimge kelýdiń «eń qolaıly ýaqyty» dep sanaıtynyn málimdedi. Bul týraly Anadolý agenttigi jazdy.
– Adamdar kelisimge kelý týraly aıtqanda, menińshe, qazir – ol úshin eń qolaıly ýaqyt. Óıtkeni elde aýyzbirshilik, kúsh pen birlik bar. Meniń bilýimshe, Iran bul soǵys pen qaqtyǵystan jeńimpaz ári qýatty memleket retinde shyqqan el sanalady, – dedi Masýd Pezeshkıan prezıdent qyzmetine kiriskennen bergi ekinshi baspasóz máslıhatynda.
Ol qazirgi jaǵdaı kelisimge qol jetkizýge jáne sheshilmegen máselelerdi dıalog arqyly retteýge múmkindik beretinin atap ótti.
ISNA jartylaı resmı aqparat agenttiginiń habarlaýynsha, Pezeshkıan Iran óz quqyqtaryn dıalog arqyly qorǵaı alatynyn jáne el men halyqtyń múddesinen basqa eshteńege umtylmaıtynyn aıtty.
Onyń sózinshe, daýlardy tek soǵys arqyly sheshý múmkin emes. Prezıdent óz úkimetiniń maýsym aıynda AQSh-pen qol qoıylǵan ózara túsinistik týraly memorandým aıasynda beıbitshilik ornatýǵa beıildi ekenin taǵy da rastady.
– Bul máselelerdi tek soǵys arqyly sheshý múmkin emes. Biz memorandým erejelerine súıene otyryp, beıbitshilikke qaraı umtylǵymyz keledi, – dedi ol.
Pezeshkıannyń aıtýynsha, eger AQSh ózi qalyptastyrǵan senimsizdik ahýalynan bas tartyp, ózara senimdi qalpyna keltirý múmkin bolsa, Tegeran memorandýmdy aldaǵy is-qımyldyń negizi retinde paıdalanýǵa nıetti. Sonymen qatar ol Irannyń Vashıngtondy áli de «senim artýǵa bolmaıtyn» tarap dep sanaıtynyn jetkizdi.
IRNA resmı aqparat agenttigi jarııalaǵan málimdemesinde Pezeshkıan dıalog Tegerannyń Vashıngtonǵa qatysty burynnan qalyptasqan ustanymyn ózgertpegenin aıtty.
Sondaı-aq Iran prezıdentiniń pikirinshe, dál dıplomatııalyq qadamdar Vashıngtondy Tegeranmen kelissóz júrgizýge májbúr etken.
– Bizdiń kelissóz júrgizip, dıplomatııaǵa júginýimizdiń ózi AQSh-ty kelissóz ústeline otyrýǵa jáne Iranmen kelisim men ózara túsinistikke qol jetkizýge májbúr etti, – dedi Pezeshkıan.
Ol memorandýmǵa qatysty aıtylǵan syndardy da joqqa shyǵardy. Prezıdenttiń sózinshe, qujatta Irannyń qandaı da bir múddesinen nemese ustanymynan bas tartýyn talap etetin tarmaq joq.
– Memorandýmnan bizdiń qandaı da bir máselede sheginis jasaǵanymyzdy kórsetetin birde-bir tarmaq taba almaısyz. Tegeran ózi qol qoıǵan ustanymynda nyq tur, – dedi ol.
Pezeshkıan Vashıngtondy memorandým talaptaryn buzdy dep aıyptady. Onyń aıtýynsha, AQSh Iran men Oman birlesip kelisýi tıis rásimderdi saqtaýdyń ornyna Ormýz buǵazyndaǵy keme qatynasynyń balama shemalaryn uıymdastyrýǵa umtylyp otyr.
Ol yqtımal zań buzýshylyqtarǵa qatysty daýlar memorandýmda qarastyrylǵan tetikter arqyly sheshilýi tıis ekenin aıtyp, qujatty iske asyrý protsesi Iran úshin «abyroımen jáne qurmetpen» jalǵasatynyna úmit bildirdi.
Pezeshkıan Irannyń kelissóz júrgizýshi delegatsııasyn da qorǵap, onyń múshelerin «óz isine berilgen, bilikti jáne eńbekqor» mamandar dep atady. Onyń pikirinshe, kelissóz júrgizýshilerge baǵyttalǵan syn ádiletsiz.
Sonymen qatar Iran prezıdenti onyń ákimshiligi ınternetke qoljetimdilikke qoıylǵan shekteýlerdi jeńildetý baǵytynda bıliktiń úsh tarmaǵynyń basshylarymen jáne Ulttyq qaýipsizdik joǵary keńesimen birlesip jumys istep jatqanyn habarlady. Bul rette qaýipsizdik máseleleri men ınfraqurylymnyń qazirgi jaǵdaıy eskerilmek.
Aıta keteıik, Ormýz buǵazyndaǵy shıelenis munaı baǵasynyń ósýine áser etti.
Al AQSh pen Iran teketiresi qalaı órbip kele jatqanyn myna jerden oqı alasyz.
