Qazir 518 kásiporyn 410 kolledjdi qamqorlyqqa aldy

ASTANA. KAZINFORM – Qazir 551 kolledjde 91 myńnan asa stýdent dýaldy oqytý negizinde bilim alyp jatyr. Bul týraly Májiliste kadrlyq áleýetti nyǵaıtý taqyrybynda ótip jatqan Úkimet saǵatynda Oqý-aǵartý mınıstri Ǵanı Beısembaev málim etti.

«Kadrlyq áleýet – eldiń tabysty damýynyń kilti jáne kásipti durys tańdaý, ásirese, mektepten bastaý alý mańyzdy ekenin Prezıdent Joldaýynda birneshe ret atap ótti. Osyǵan baılanysty Mınıstrlik mamandyqty sanaly jáne erkin tańdaýǵa baǵyttalǵan «Maman» ulttyq baǵdarlamasynyń jobasyn ázirledi. Baǵdarlamanyń negizgi maqsaty – oqýshylardyń qyzyǵýshylyqtaryn aıqyndaı otyryp, eńbek naryǵynyń suranysyna sáıkes keletin baǵyttaryn damytý», - dedi Ǵ. Beısembaev.

Sonymen qatar ol jumys berýshilerdi tarta otyryp kadrlar daıarlaý jumystary júzege asyp jatqanyn aıtty. Bıznes pen kolledjdiń tyǵyz qarym-qatynasyn ornatýdyń bir tásili – kolledjderdi qamqorlyqqa alý. Qazir 518 kásiporyn 410 kolledjdi qamqorlyqqa aldy. Kásiporyn ókilderi qamqorshylyq keńesterge kiredi, materıaldyq-tehnıkalyq bazany jabdyqtaıdy, óndiriste júıeli tájirıbe uıymdastyrady.

«Qazirgi kezde 551 kolledjde 91 myńnan asa stýdent dýaldy oqytý negizinde bilim alýda. Al 2029 jyly 160 myńǵa jýyq stýdentti qamtıtyn bolamyz. Eńbek kodeksine sáıkes dýaldy oqytýdaǵy praktıkalyq kezeń stýdenttiń eńbek ótiline esepteledi (6 aıdan 1,5 jylǵa deıin). Búgingi tańda akademııalyq derbestik negizinde, kásiptik standarttar jáne WorldSkills talaptary eskerilip, 8 myńnan astam bilim berý baǵdarlamasy naqtylandy ári tizilimge engizildi. Sonymen qatar, jumysqa ornalastyrý mindettemesimen kásiporyndardyń nysanaly tapsyrysy boıynsha kadrlardy daıarlaý júzege asyrylyp otyr. Qazir 30 myńnan astam stýdent oqysa, 2029 jyly 80 myń stýdentti qamtý kózdelgen», - dedi mınıstr.

Budan buryn habardlanǵandaı, QR Parlamenti Májilisi tóraǵasynyń orynbasary Danııa Espaevanyń aıtýynsha, tehnıkalyq jáne kásiptik bilim berýdi reformalaý arqyly jumysshy kásipterdiń bedelin arttyrý qajet. Sebebi qazirgi kezde kásiptik-tehnıkalyq bilimi bar mamandyqtarǵa degen suranys joǵary bilimdi túlekterge degen qajettilikten 70 paıyzǵa artyq.

Eske salsaq, bıyl kúzde kolledj stýdentteriniń stıpendııasy taǵy 50 paıyzǵa ósti.