«Qazposhtanyń» shyǵyny qansha
NUR-SULTAN. QazAqparat – «Qazposhta» AQ jyl saıyn 9 mlrd teńge shyǵynǵa tap bolýda. Bul týraly atalǵan kompanııanyń personal jáne ózgeristerdi basqarý jónindegi basqarýshy dırektory Aqmaral Naızabekova málim etti, dep habarlaıdy QazAqparat tilshisi.
«Jyl saıyn álemde elektrondyq kommertsııa naryǵy damýda. Osy naryqta biz de aıtarlyqtaı jaqsy ósip kelemiz. Alaıda kompanııaǵa shyǵyn keltirip turǵan birqatar qyzmetter de bar. «Qazposhta» quramyndaǵy 3,3 myń bólimsheniń arasynda 2,7 myńy tıimsiz. Bul turǵyda bizdiń jeliler jyl saıyn shamamen 9 mlrd teńge shyǵyn keltiredi», - dedi A. Naızabekova Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda.
Osy oraıda, ol qaı baǵyttar kompanııa úshin shyǵyn keltirip turǵanyn naqtylady.
«Bul óz kezeginde ınfraqurylymǵa, kólikterge, jetkizý ýchaskelerine baǵyttalǵan shyǵyndar men qyzmetkerlerdiń eńbekaqysyn qamtyp tur. ıAǵnı, biz áleýmettik mańyzy bar qyzmetti oryndaýdamyz, sáıkesinshe, eldi mekenderdegi bólimshelerdi jaba almaımyz. Tek ótken jyly memleketten 4 mlrd teńgeden astam somaǵa sýbsıdııa aldyq. Degenmen onyń kólemi barlyq shyǵyn somasyn jappaıdy», - dedi ol.
Onyń sózine qaraǵanda, qalalardaǵy tıimdi basqa qyzmetter esebinen atalǵan shyǵyndar jabylyp keledi.
«Elektrondyq kommertsııany damytý men bıznesti tartý esebinen ınfraqurylymǵa jumsalatyn shyǵyndardy jabý kózdelip otyr. Jalpy, kompanııa tabys deńgeıin saqtap tur. Jylyna kompanııa shamamen 200-300 mln teńge kólemindegi tabys alýda», - dedi A. Naızabekova.
Aıta keteıik, búgin Parlament Senaty Ekonomıkalyq saıasat, ınnovatsııalyq damý jáne kásipkerlik komıtetiniń keńeıtilgen otyrysynda «Dúnıejúzilik poshta odaǵynyń Jarǵysyna Toǵyzynshy qosymsha hattamany ratıfıkatsııalaý týraly» zań jobasy qaraldy.
