Qazposhtanyń konvertteri elektrondy markamen belgilenýde
ALMATY. QazAqparat - «Qazposhta» AQ qarapaıym hattardy elektrondyq markaly konvertke salyp, jóneltý jáne olardyń jetý barysyn qadaǵalaý qyzmetin iske qosty. Bul qosymsha qyzmet Qazaqstan Respýblıkasy boıynsha qarapaıym hattardy jetkizýdiń sapasyn jaqsartý maqsatynda engizilgen, dep habarlaıdy «Qazposhta» AQ baspasóz qyzmetinen.
Elektrondyq markaly poshtalyq konvert - bul ústine baspahanalyq tásilmen biregeı shtrıh-kod salynǵan konvert. Hatty jóneltýshi sonyń kómegimen hattyń júrip ótý jolyn, tipti hattyń poshta jáshigine túskenge deıingi kezeńin qadaǵalaýǵa múmkindik alady. Jeke tulǵalar úshin osyndaı konvertpen jóneltý quny - 100 teńge.
Elektrondyq markaly poshtalyq konvertti satý barysynda túbirtekte konverttiń shtrıh-kodynyń nómiri kórsetiledi, sol arqyly jóneltýshi hattyń trekıngin, ıaǵnı júrý barysyn post.kz. saıtynan qadaǵalaı alady. Hatty kez-kelgen ýaqytta - kóshedegi poshta jáshigine nemese bólimsheniń jumys isteý tártibine qaraı, poshtalyq baılanys bólimshesinen jóneltýge bolady.
Poshta tasýshy hatty ony alýshynyń abonenttik poshtalyq jáshigine jetkizedi de, poshtany jetkizý paraǵyna «Abonenttik jáshikke túsirildi» degen belgi qoıady, dál sondaı belgi kompıýterdiń baǵdarlamalyq jasaqtamasyna da qoıylady.
Elektrondyq markaly konvertterde qarapaıym hattardy jóneltý boıynsha qanatqaqty joba jeke tulǵalar úshin 2015 jyldyń qazan aıynda Astana, Shyǵys Qazaqstan jáne Ońtústik Qazaqstan oblystyq bólimshelerinde qolǵa alynǵan bolatyn. Sodan beri kúni búginge deıin barlyǵy 8 000 elektrondyq markaly konvert satylǵan jáne júıe arqyly júrgizilgen.
Endi, jaqyn ýaqytta jańa qyzmet barlyq fılıaldarda qoljetimdi bolady.
