Qazposhtanyń qarjylyq taza kirisi belgili boldy
ASTANA. QazAqparat - Ótken jyly «Qazposhta» AQ-nyń kiristeri 11 paıyzǵa artty. Bul týraly Astanada baspasóz máslıhatynda basqarma tóraǵasy Sáken Sársenov málim etti, dep habarlaıdy QazAqparat tilshisi.
«Ózderińiz biletindeı 2018 jyly Qazposhta 25-jyldyǵyn atap ótti. Jyl qorytyndylarymyz da jaman emes. Mysaly, 2017 jylmen salystyrǵanda, kiristerimiz 11 paıyzǵa ósti. Aqshalaı túrde bul kórsetkish 54,5 mlrd teńgeni qurady, al shyǵystar 54,2 mlrd teńgege jetti. Osylaısha, taza kiris 272 mln teńge qurady», - dedi «Qazposhta» basshysy.
Onyń sózine qaraǵanda, byltyr klıentterge 18,6 mln sálemdeme jetkizilgen, olardyń 4,7 mln ishki naryqqa tıesili.
«2018 jyly biz klıentterge jaqyn bolý úshin seriktestik jelisin iske qostyq. Búginde «Qazposhtamen» 160 franchaızı kásipkerler yntymaqtastyq ornatyp, 200 saýda núktelerin ashty. Olar arqyly 2 mlrd 600 mln teńge somasynda 493 myń tranzaktsııa júrgizildi», - dep naqtylady S. Sársenov.
Budan buryn habarlanǵandaı, «Qazposhta» AQ basqarma tóraǵasy Qazaqstan aýmaǵyndaǵy elektrondyq kommertsııanyń jaǵdaıyna qatysty túsinik berdi.
Belgili bolǵandaı, elimizde ınternet arqyly satyp alýshylar 2,3 mıllıonnan asty.
