Qazposhtany óz kúzetshileri tonaǵan
ASTANA. 10 sáýir. QazAqparat - Almaty qalasynda krımınaldyq polıtsııa qyzmetkerleri naýryz aıynyń ortasynda «Qazposhta» AQ-nyń ǵımaratyna jasalǵan qaraqshylyq shabýylyna qatysy bar 3 azamatty qolǵa túsirdi.
QR ІІM baspasóz qyzmetiniń málimetterine qaraǵanda, 17 naýryz kúni túngi saǵat 2-lerdiń shamasynda 4 qylmysker ǵımaratqa basa-kóktep kirgen. Kúzetshige qoqan-loqy kórsetip, uryp-soǵyp, skotchpen baılap tastaǵan. Keıin bankomatty syndyryp, 13 mıllıon 858 myń teńgeni qoldy qylyp, oqıǵa oryn alǵan jerden izderin sýytady.
Anyqtalǵandaı, ustalǵandardyń ekeýi atalǵan aktsıonerlik qoǵamda kúzetshi bolyp qyzmet etedi, al úshinshisi buryn adam óltirip sotty bolǵan álgilerdiń tanysy. Barlyǵy da Shyǵys Qazaqstan oblysynda týyp-ósken.
Olardan urlanǵan somanyń bir bóligi - 1 mıllıon 300 myń teńge tárkilenip alyndy. Kúdiktilerdiń sózine qaraǵanda aqshanyń qalǵan bóligi qylmystyq iske qatysqan tórtinshi sybaılasta kórinedi.
Ustalǵandar qamaýǵa alynyp, qazirgi tańda olardyń buǵan deıin jasalǵan osyǵan uqsas qylmystarǵa qatystylyǵy tekserilý ústinde. Qaraqshylyq shabýylyna qatysy bar tórtinshi kúdiktiniń júrgen jerin anyqtap, qolǵa túsirý maqsatynda jedel izdestirý sharalary júrgizilýde.
