Qazposhta shatyry ústine qulaǵan Jambyl turǵyny 18,5 mln teńge ótemaqy óndirip aldy

TARAZ. KAZINFORM — 2023 jyldyń kókteminde Jambyl aýdany, Asa aýylynda qatty jel «Qazposhta» AQ fılıaly ǵımaratynyń shatyryn ushyryp ketip, ol áıeldiń ústine qulaǵan. Zardap shekken azamatsha shuǵyl túrde reanımatsııaǵa jetkizilgen bolatyn. Osy oqıǵaǵa baılanysty QR Joǵarǵy soty sheshim shyǵardy. Bul týraly sottyń baspasóz qyzmeti málim etti. 

«Jábirlenýshige jabyq bas mıynyń jaraqaty, keýde qýysynyń jáne julynnyń zaqymdanýy, bet pen bilektiń keń skalpırlengen jarasy, 3-4 omyrtqanyń qysylyp synýy sıaqty aýyr dene jaraqattary keltirilgen. Áıelge 1 toptaǵy múgedektigi sanaty belgilengen», — delingen habarlamada. 

Málim bolǵandaı, Qazposhtanyń Jambyldaǵy fılıaly zardap shekken azamatshanyń qyzy túsirgen shaǵymǵa jaýap bere otyryp, oǵan 7 mln teńge kómek kórsetken. Alaıda qarajat  shetelde emdelýge jáne ońaltýǵa jumsalǵan barlyq shyǵyndardy óteýge jetpeı qalǵan.  

«Sondyqtan jábirlenýshi densaýlyqqa keltirilgen zııan men moraldyq zııan úshin ótemaqy óndirip alý týraly talap qoıýmen sotqa júgingen. Sotta AQ ókili talap qoıýdy moıyndamady, 2021-2022 jyldary AQ-men shatyrǵa jóndeý júrgizilgenin, biraq arhıvten jóndeý jumystaryna qatysty qujattar tabylmaǵanyn, sáıkesinshe shatyrdy aýystyrǵan merdigerdi anyqtaý múmkin bolmaǵanyn aıtyp túsindirgen», — dep habarlady sottan. 

Sotta shatyrdyń qulaýy merdiger sapasyz oryndaǵan jóndeý jumystarynyń saldarynan onyń jetkiliksiz nyǵaıtylmaǵanyna baılanysty bolǵandyǵy anyqtaldy.

«Sot Qazposhta ǵımaratynyń qaýipsizdigi men paıdalanýynyń tıisti deńgeıin qamtamasyz etpedi degen qorytyndyǵa keldi, sebebi AQ ǵımaratty kútip ustaýǵa jáne shatyrdyń kúrdeli jóndeý jumystaryn baqylaýǵa jaýapty bolyp tabylady. Osyny eskere otyryp, talap qoıý ishinara qanaǵattandyryldy: Qazposhtadan 8,5 mln teńge materıaldyq zalaldyń ótemaqysy jáne 10 mln teńge moraldyq zııan óndirildi», — delingen sottyń habarlamasynda.

Sheshim zańdy kúshine engen joq. 

Eske sala keteıik, Almaty oblysynda Qazposhtanyń 2 kassıri salyq qarjysyn jymqyrǵanyn jazǵan bolatynbyz.