Qazposhtanyń gazet jetkizý tarıfi Úkimet deńgeıinde talqylanýy múmkin

ASTANA. KAZINFORM — Mádenıet jáne aqparat mınıstrligi «Qazposhtamen» merzimdi basylymdardy jetkizý tarıfi boıynsha ortaq mámlege kelmese, Úkimet deńgeıinde talqylaýy múmkin. Bul týraly Májilis depýtatynyń saýalyna joldanǵan jaýapta aıtylǵan. 

— 2025 jylǵy 10 qarashada ózderińizdiń bastamashylyqtaryńyzben «Qazposhta» AQ, «Atameken» UKP, «Qazaq gazetteri» JShS, memlekettik organdar, óńirlik merzimdi baspasóz basylymdary ókilderiniń qatysýymen keńes ótkizildi. Ókinishke qaraı, keńeste tarıfterdi tómendetý týraly kelisimge qol jetkizilgen joq. Qazposhta olardy qaıta qaraý josparda joq ekendigin málimdedi, — dep jazylǵan jaýapta.

Mınıstrlik mamandary gazet-jýrnaldarmen aradaǵy kelisimshartta Qazposhtanyń basym quqyqtary saqtalǵanyn aıtyp otyr.

— MBB múddeleri jetkilikti deńgeıde qorǵalmaǵan, bul naryqtaǵy monopolııalyq táýekelderdi kúsheıtedi. Osy rette kelisimsharttardy qaıta qarap, taraptardyń teń quqyqtary men jaýapkershilikterin bekitý jáne kelisimshartqa mindetti túrde ózgeris engizý múmkindigin jáne daýlardy qaraýdyń aıqyn tetigin engizý qajet dep sanaımyz, — dep jazady mınıstrlik mamandary.

Mınıstrlik «Qazposhtany» tarıf saıasatyn ózgertýdi kózdese, 3 aı buryn jarııa habarlandyrýǵa mindetteý máselesin kótermekshi.

— Óńirlerde baspasózdiń ýaqtyly jetkizilmeýi júıeli sıpat alǵan. Kelisimsharttar men zańnamada Qazposhtanyń kesh jetkizýine qatysty arnaıy sanktsııalar nemese naqty jaýapkershilik tetigi joq. Osy rette jetkizý merzimi buzylǵan jaǵdaıda aıyppul sanktsııalaryn qarastyratyn talaptardy engizý, qajet bolǵan jaǵdaıda ákimshilik jaýapkershilikti engizý arqyly kúsheıtý qajet dep sanaımyz, — delingen jaýapta.

Mınıstrlik gazet jetkizý tarıfine baılanysty qosymsha jıyn ótkizbekshi.

— Merzimdi baspasóz basylymdaryna júktelgen aqparattyq qaýipsizdik pen qoǵamdyq turaqtylyqty qamtamasyz etýge baǵyttalǵan mańyzdy róldi eskere otyryp, týyndaǵan máselelerdi jan-jaqty talqylaý úshin múddeli taraptardyń qatysýymen qosymsha jınalys uıymdastyrý josparlanýda. Aldaǵy jınalys barysynda ortaq sheshimge kele almasaq, máseleniń ózektiligin eskere otyryp, ony Úkimet deńgeıinde qarastyrý múmkindigin nazarǵa alynady, — dep jazady vıtse-mınıstr Qanat Ysqaqov.

Aıta ketý kerek, poshta salasyndaǵy qyzmetterge tólenetin sýbsıdııa mólsherin Jasandy ıntellekt jáne tsıfrlyq damý mınıstrligi aıqyndaıdy. Al byltyr osy vedomstvo ókili gazet-jýrnal jetkizý qyzmetin Mádenıet jáne aqparat mınıstrligine berýge qarsy emes ekenderin málimdegen bolatyn.