Qazposhtany basqarǵan Ásel Janasova nesimen este qaldy
ASTANA. KAZINFORM – Ásel Jubanyshqyzy Janasova Qazaqstan Respýblıkasy Prezıdentiniń keńesshisi laýazymyna taǵaıyndaldy. Eki jarym jyldan astam «Qazposhta» AQ-ny basqarǵan onyń nesimen este qalǵanyn jáne qandaı mańyzdy sheshimder qabyldaǵanyn saraptap shyǵýdy jón kórdik.
Ásel Janasovanyń eńbek joly
Á. Jubanyshqyzy 1987 jyly Almatyda dúnıege kelgen. 2010 jyly Kembrıdj ýnıversıtetin ınformatıka mamandyǵy boıynsha bitirgen (bakalavrıat), al 2014 jyly Kembrıdj ýnıversıtetinde ınformatıka mamandyǵy boıynsha magıstr dárejesin aldy. 2016 jyly M.V. Lomonosov atyndaǵy Máskeý memlekettik ýnıversıtetinde MBA Executive Management bitirdi.
Mansap jolyna toqtalsaq, 2010-2014 jyldar aralyǵynda ENRC PLC Group aqparattyq tehnologııalar qaýipsizdigi bóliminiń basshysy boldy. 2014-2015 jyldar aralyǵynda - QR Ulttyq Banki Aqparattyq tehnologııalar departamenti dırektorynyń orynbasary, 2016-2017 jyldar aralyǵynda «Zerde» ulttyq aqparattyq-kommýnıkatsııa holdıngi» AQ Basqarma tóraǵasy, 2017-2020 jyldar aralyǵynda «Astana» halyqaralyq qarjy ortalyǵynyń tsıfrlyq tehnologııalar (CDO) jónindegi basqarýshy dırektory qyzmetterin atqardy. 2020-2022 jyldar aralyǵynda QR Saýda jáne ıntegratsııa vıtse – mınıstri laýazymynda boldy.
2022 jylǵy 3 qazannan bastap qazirgi ýaqytqa deıin «Qazposhta» AQ Basqarma tóraǵasy jáne «Qazposhta» AQ Dırektorlar keńesiniń múshesi qyzmetin atqardy.
Qazposhta tabysy
2023 jyldyń basynda Ásel Janasova Qazposhtadaǵy qarjylyq jaǵdaıdy ońaltý, áleýmettik bankti damytý jáne qarjylyq qyzmetterdiń rólin kúsheıtý, qoldanystaǵy ınfraqurylymdar bazasynda memlekettik qyzmetterdi usyný múmkindigin keńeıtý, sondaı-aq elektrondy kommertsııa men halyqaralyq sálemdemelerge basa mán bere otyryp, dástúrli poshta bıznesiniń tıimdiligin arttyrý basym baǵyttar bolatynyn mádimdegen edi.
Bul rette, Qazposhta qarjylyq jaǵynan da, poshta qyzmetterin kórsetý sapasyn jaqsartý jaǵynan da belsendi jumys atqardy. Sol kezde «Esikten esikke» kýrerlik jóneltimderdiń 90 paıyzy 36 saǵat ishinde jetkizilip otyrdy, ıaǵnı 2022 jyldyń kórsetkishterimen salystyrǵanda bul kórsetkish ósti. Jol boıyndaǵy barlyq poshta jóneltilimderiniń jaı-kúıin baqylaý úshin onlaın monıtorıng júıesi engizildi. Sonymen qatar Qazposhta dástúrli túrde elektrondyq kommertsııa men tsıfrlandyrýdy damytýǵa erekshe kóńil bóldi.
Ásel Janasova «Qazposhta» tizginin ustaǵanyna bir jyldan asqan kezde alǵashqy jetistikterdi jarııalady.
– 2022 jyly 12 mlrd teńge shyǵynmen qabyldap aldym. Qaryz degennen shyǵyn degen durys. Jalpaq tilmen aıtqanda, mınýsqa kirip ketken. Shyǵyny kóp, al tabysy bolmaǵan. Josparly shyǵyny bar kompanııa bolǵan. Meniń oıymsha, mınýsqa baǵyttalǵan josparmen jumys isteý degen durys emes. Men kelgen kezde 20 myń qyzmetkerdiń aılyǵyn 25 paıyz ındeksteý kerek boldy, ıaǵnı 2023 jylǵy shyǵynymyzǵa qosymsha 10 mlrd teńge qosyldy. Ol úshin jospardaǵy tabysty da 10 mlrd teńgege kóterdik. 2023 jyldy biz +3 mlrd teńgemen jaýyp jatyrmyz, - dedi ol.
Sondaı-aq ol shyǵynǵa qurylǵan josparly jyldy qalaısha tabyspen aıaqtaǵanyn túsindirdi.Eń birinshiden, shyǵyndar ońtaılandyryldy. 10 mlrd teńgeniń kerek emes josparyn, kerek emes jobalar toqtatyldy.
Sol kezde «Qazposhta» bashysy kassadaǵy bylyqtar da kásiporyn jumysyn turalatyp kelgenin aıtyp, tıisti sharalardy qabyldady.
2024 jyldyń qorytyndysy
2025 jyldyń basynda Ásel Janasovany Prezıdentke kompanııanyń byltyr atqarǵan qyzmetiniń nátıjeleri, qarjylyq jaǵdaıy, sondaı-aq damýdyń perspektıvti baǵyttary týraly esep berildi. Sońǵy eki jylda «Qazposhta» taza tabys taýyp, bıýdjetke 45 mıllıard teńge kóleminde salyq jáne baj alymdaryn tóledi. Tasymal úderisin ońtaılandyrý esebinen poshtalyq jóneltilimderdiń kólemi 26 paıyzǵa ósti. Atap aıtqanda, 20 mıllıon, sonyń ishinde 9 mıllıon halyqaralyq sálemdeme jetkizilgen.
Qyzmet sapasyn jaqsartý maqsatynda engiziletin ınnovatsııaǵa toqtalsaq, osy oraıda Japan Post, Toshiba jáne Cainiao kompanııalarymen kólik jáne logıstıka salalarynda birlesken jobalar júzege asyrylyp jatyr. Budan bólek, halyqaralyq marketpleısterge qoljetimdilikti qamtamasyz etetin Keruen servısi damyp keledi.
Qazposhta úzdik poshta operatorlarynyń bestigine endi
Aıtpaqshy, kompanııa Dúnıejúzilik poshta odaǵynyń reıtıngisi boıynsha alǵash ret eń úzdik 50 poshta operatorynyń qataryna kirgen. Sonymen qatar, byltyr kúzde Qazposhta «Úzdik jetkizýshi», «Bıznesti ártaraptandyrý» jáne «Ekologııalyq turaqtylyq» nomınatsııalary boıynsha halyqaralyq syılyqtyń úzdik bestigine kirdi.
Marapattar Amsterdamdaǵy Amazon, DHL, Nova Post jáne t. b. sekildi sala jetekshileri óz jetistikterin usynatyn poshta jáne sálemdeme tehnologııalary salasyndaǵy eń iri is-shara — «Parcel+Post Expo» kórmesiniń aıasynda tabystaldy. ⠀Qazposhta óziniń úsh negizgi baǵyttaǵy ınnovatsııalyq qyzmetimen kóptiń nazaryna bólendi. «Bıznesti ártaraptandyrý» nomınatsııasynda kompanııa kiristerdi ulǵaıtý jáne korporatıvtik bankıngti damytýdy qosa alǵanda, naryqtaǵy ózgeristerge beıimdelý jónindegi bastamalary úshin atap ótildi. «Ekologııalyq turaqtylyq» sanatynda Qazposhta aýyldyq poshta bólimshelerinde eko-habtar qurýǵa, qyzmetkerler men klıentterge qaldyqtardy bólek suryptaý boıynsha oqytý ótkizýge sep bolǵan «Jasyl damý» jobasyn usyndy. Qazposhtanyń «Parcel+Post Expo» kórmesine qatysýy onyń álemdik naryqtaǵy ornyn nyǵaıtady jáne Qazaqstannyń ınklıýzıvti jáne turaqty poshta bolashaǵyn qurýdaǵy básekege qabilettiligin rastaıdy.
Poshta qyzmeti arqyly dári-dármek jetkiziledi
Jyl basynda Memleket basshysy «Qazaqstan Respýblıkasynyń keıbir zańnamalyq aktilerine baılanys qyzmetterin kórsetý, memlekettik satyp alý, kólik jáne poshta máseleleri boıynsha ózgerister men tolyqtyrýlar engizý týraly» Zańyna qol qoıdy.
Poshta salasyndaǵy zańnamany jetildirý aıasynda poshta baılanys naryǵyn, onyń ishinde elektrondyq saýdany damytýǵa, poshta baılanysynyń sýbsıdııalanatyn ámbebap qyzmetterin qysqartýǵa, poshta salasyndaǵy ýákiletti organnyń qyzmetin bıýrokratııadan aryltýǵa baǵyttalǵan túzetýler kózdelgen.
Qazir 2054 aýyldyq poshta bólimshesi jumys isteıdi, olar qolma-qol aqsha, hattardy, gazetterdi jetkizýdi, tólemderdi qabyldaýdy qamtamasyz etedi jáne barlyq 6209 aýyldy eldi mekenderdiń turǵyndaryna memlekettik qyzmet kórsetedi.
Qujatta poshta operatorlarynyń qyzmetteri paıdalanýshylarǵa yńǵaıly bolý úshin PIN-kodty terý nemese QR-kodty oqý arqyly adresattyń kelisimin ala otyryp, poshta jóneltilimin úshinshi tulǵalarǵa tapsyrý múmkindigin qarastyrý eskerilgen. Ulttyq operatorǵa, ıaǵnı «Qazposhta» aktsıonerlik qoǵamyna densaýlyq saqtaý salasyndaǵy zańnamanyń talaptaryna sáıkes dárilik zattar men medıtsınalyq buıymdardy tasymaldaý jáne saqtaý quqyǵy beriledi.
Bul turǵyda Á. Janasova kompanııaǵa dári-dármekti jetkizý de qomaqty tabystyń joly bolatynyn aıtty.
0,2 stavka aılyqqa jumys istep júrgen poshtashylar bar
Byltyr jeltoqsan aıynda Ásel Janasova aýyldaǵy poshta qyzmetkerleriniń aılyǵy ósý úshin turǵyndar poshta arqyly sálemdemelerdi barynsha kóp joldap, qabyldaýy kerek ekenin aıtty.
– Iá, shyny kerek, bizdiń aýyldaǵy operatorlarymyz, poshtashylarymyz az alady. Nege deseńiz, bul aýylǵa sálemdemeler men hattyń az kelýine baılanysty. ıAǵnı, soǵan baılanysty 0,2 nemese 0,5 stavkamen jumys isteıdi. 0,7 stavkamen de jumys isteıtinder bar. Ol endi aýyl turǵyndaryna baılanysty, - dedi ol.
«Qazposhta» basshysy keıingi eki jylda poshtashylardyń aılyǵy óskenin eske saldy.
– 2023 jyly poshta qyzmetkerleriniń aılyǵyn 25 paıyzǵa kóterdik. Bıyl taǵy 15 paıyzǵa kóterdik. Jyl saıyn barlyq «Qazposhta» qyzmetkerlerine 3 ret syıaqy beremiz. Onyń ózi biz úshin úlken qarajatty qajet etedi. ıAǵnı, aýyldarǵa joldanatyn sálemdemelerdiń kóbeıýine baılanysty aılyqty da kótere alamyz, - dedi Ásel Janasova.