Kazposhtadan 66 mln teńge urlaǵan azamat ustaldy - Qyzylorda
QYZYLORDA. QazAqparat - Qyzylorda oblysy Shıeli aýdanyndaǵy Kazposhta mekemesiniń ishinen 66 mıllıon teńge kólemindegi qarjyny urlaǵan 50 jastaǵy azamat ustaldy, dep habarlady QazAqparat tilshisi oblystyq ІІD silteme jasap.
Oqıǵa 2017 jyldyń jeltoqsan aıynyń 17-nen 18-ne qaraǵan túni bolǵan. Belgisiz adam Shıeli kentinde ornalasqan Kazposhta ǵımaratynyń ishine plastık terezin ashý arqyly jasyryn kirip, edende jatqan qapshyq ishindegi 66 000 000 teńgeni jáne makarov tapanshasyn urlap, oqıǵa bolǵan jerden boı tasalaıdy.
Jedel túrde izdestirý sharalary qabyldanyp, nátıjesinde Shıeli aýdanynyń 1967 jyly týylǵan turǵyny ustalyp, ýaqytsha ustaý abaqtysyna qamaldy.
Atalǵan derek Qazaqstan Respýblıkasy Qylmystyq kodeksiniń 188-baby 4-bóligi 3-tarmaǵyna sáıkes Sotqa deıingi tergep-tekserýdiń biryńǵaı tizilimine tirkelip, tergeý amaldary júrgizilýde.
