«Qazposhta» jumysqa qabyldaý, zeınetaqy tóleý jáne memlekettik satyp alý jumystaryn avtomattandyrady
Bul týraly «Qazposhta» AQ basqarma tóraǵasy Sáken Sársenov Feısbýktegi «Antikor Life» suhbatynda aıtyp berdi.
«Birneshe jyl buryn «Qazposhtada» ǵana emes, birneshe uıymdarda jumysqa ornalasý boıynsha qıyndyqtar kezdesetin. Endi jumysqa qabyldaý avtomattandyrylǵan protseste ótedi jáne «ortańǵy býyn» esh sheshimge yqpal ete almaıdy. Bul – birinshi mindet. Ekinshiden, memlekettik satyp alý júıesi de elektrondy júıege aýystyrylady. Barlyq maquldaý jáne sheshim shyǵarý protsesteri avtomattandyrylady jáne bul protsesti jyldan-jylǵa jaqsartyp kelemiz», - dedi S. Sársenov.
«Qazposhta» basshysy birneshe jyl buryn shalǵaı aýyldarda poshta qyzmetkerleriniń zeınetaqyny turǵyndarǵa tolyq taratpaǵany týraly oqıǵa bolǵanyn atap ótti. Bul másele de avtomattandyrý jolymen sheshilmek. Sońǵy jyldary zeınetkerlerdiń basym bóligi bank kartalary arqyly tólemaqy alatyn boldy. Endi shamamen 500 myń zeınetker ǵana zeınetaqyny qolma-qol alyp keledi. Munda da ádiletsizdikke jol bermeý úshin poshta qyzmetkerine arnaıy qosymshasy bar uıaly telefon berildi. Poshta qyzmetkeri taratqan zeınetaqy kólemin sol qosymshada kórsetip otyrýy tıis. Ázirge zeınetkerler tarapynan esh shaǵym túspedi.
Aıta keteıik, QR Sybaılas jemqorlyqqa qarsy is-qımyl agenttigi pen «Qazposhta» AQ sybaılas jemqorlyqqa qarsy kúreske arnalǵan poshta markalaryn satylymǵa shyǵardy.
