«Qazposhta» sotqa shaqyrtý qaǵazdaryn jetkizý úshin gıbrıdtik poshtany synaqtan ótkizbek

ASTANA. QazAqparat - «Qazposhta» AQ sotqa shaqyrtý qaǵazdaryn jetkizý úshin gıbrıdtik poshtany synaqtan ótkizedi. Bul týraly búgin «Samuryq-Qazyna» Ulttyq Ál-aýqat Qory» AQ Basqarma tóraǵasy Ómirzaq Shókeevtiń qatysýymen «Qazposhta» AQ dırektorlar keńesi, aktsıonerleri jáne qyzmetkerleriniń keńesinde málim boldy.

«Qazposhta» AQ basqarma tóraǵasy Baǵdat Mýsınnyń aıtýynsha, ilki rejımde synaqtan ótetin gıbrıdtik poshta Joǵarǵy sot pen kompanııanyń elektrondyq júıesin ıntegratsııalaýdy qarastyrady. «Ol júıe boıynsha habarlamalardyń barlyǵy elektrondy túrde ótip, avtomatty túrde basylyp, mórlenýi kerek. Bul shara memleket qarjysymen qosa, poshta qyzmetiniń qarajatyn da únemdeıdi. Memleket úshin shaqyrtýdyń 2-3 kúnnen aspaıtyn merzimde tıisti qolǵa jetýi mańyzdy bolsa, poshta úshin qujattar paketin jetkizý barysyndaǵy kedergilerdi barynsha joıý mańyzdy», - deıdi B.Mýsın.

Bul rette kompanııa basshysy, poshtaǵa áleýmettik nysan retinde qaramaý kerektigin atap ótedi, óıtkeni «Qazposhtanyń» kommertsııalyq baǵyty da barshylyq. «Osyǵan baılanysty, Úkimet «Qazposhtanyń» elge zeınetaqy jetkizýinde shyǵyn kórmeýi úshin kompanııa bıýdjetin arttyryp qana qoımaı, syıaqy boıynsha komıssııasyn da kóterip otyr», - dedi ol.