Qazposhta shalǵaı aýyldarǵa hat-habardy dronmen jetkizedi
ASTANA. QazAqparat - Qazposhta shalǵaı aýyldarǵa gazet-jýrnal men hat jetkizý úshin tórt kelige deıin júk kóteretin ushý aparattaryna synaq júrgizip jatyr, dep habarlaıdy QazAqparat tilshisi.
Eske sala ketsek, ótken jyldyń qyrkúıek aıynda eki kelige deıin júk kóteretin poshtalyq drondar ushyrylǵan edi.
«Poshtany tasymaldaıtyn avtokólikterden basqa 37 poshtalyq vagonymyz bar, oǵan qosa shalǵaıdaǵy aýyldarǵa poshtany 2 kelige deıin kóteretin drondarmen jetkizýdi qolǵa aldyq. (...) Keıde eki keli gazet-jýrnaldy shalǵaı aýylǵa jetkizý úshin tutas avtokólik buralań taý jolymen 150 shaqyrym júretin. Al qazir poshtalyq dron taýdy kesip ótý arqyly 40 shaqyrym ǵana ushady jáne poshtany jyldam jetkizedi. Bul árıne, tıimdi», - dedi «Qazposhta» AQ Basqarma tóraǵasy Sáken Sársenov Ortalyq kommýnıkatsııalar qyzmetinde ótken baspasóz máslıhatynda.
Byltyrdan beri Qazposhta 1,5 tonna bolatyn hat-habardy dron arqyly jetkizgen.
«Qazirgi ýaqytta shalǵaıda, ásirese taýly ólkelerde ornalasqan 30 eldi mekenge poshtany dronmen jetkizýdemiz. Sonymen birge, tórt kelige deıin júk kóteretin drondardy synaqtan ótkizip jatyrmyz, olardy jaqyn arada iske qosamyz», - dep óz sózin túıindedi Sáken Sársenov.
Aıta keteıik, Qazposhta bul ushý apparattaryn satyp alǵan joq. Kompanııa memlekettik-jekeshelik seriktestik arqyly dron qyzmetine, árbir ushýǵa aqy tóleıdi. Ushýdyń bir shaqyrymy 90 teńgeni quraıdy. Klıentter úshin baspasóz ónimderi men hattardy jiberý aqysy arttyrylmaıdy.
Basqarma tóraǵasy keltirgen derekterge sáıkes, kompanııada 22 myńnan astam adam jumys isteıdi. Úsh jarym myńǵa jýyq bólimshelerdiń 80 protsenti avtomattandyrylǵan. Fılıaldardyń 70 protsenti aýyldyq jerlerde ornalasqan jáne olar aýyldyq eldi mekenderdi tutas qamtyp otyr.
Foto: express-k.kz
