«Qazposhta» sálemdemeleriniń joǵalýy nebári 0,03 paıyzdy ǵana quraıdy
ASTANA. QazAqparat - «Qazposhta» sálemdemeleriniń joǵalýy nebári 0,03 paıyzdy ǵana quraıdy. Bul týraly búgin elordada ótken baspasóz máslıhatynda «Qazposhta» AQ-nyń bıznes jónindegi basqarýshy dırektory Azat Mashabaev aıtty, dep habarlaıdy QazAqparat.
«Aǵymdaǵy jyly biz arqyly 100 mıllıon sálemdeme ótti. Onyń ishinde joǵalý deregi 0,03 paıyzdy quraıdy. Transformatsııalaýdyń barlyq jumystary dál osy baǵytta júrgizilýde. Biz joǵalatyn sálemdemeleler sanyn barynsha tómendetpekpiz. Kóp jaǵdaıda bizdiń esh kinámiz bolmaıdy. Óıtkeni, ınternet-dúkennen Qazaqstanǵa deıingi tizbekke 3-4 poshta men 2-3 tasymaldaýshy qatysady. Qazirgi ýaqytta Qazaqstanǵa sálemdeme kelgen kezde onyń ishinde salynǵan taýardyń bolmaı qalýy jıi kezdesetin boldy. ıAǵnı, atalǵan taýar jolda joǵalyp ketedi», - dedi ol.
Basqarýshy dırektordyń sózine qaraǵanda, qazirgi ýaqytta «Qazposhtada» arnaıy turaqty komıssııa jumys isteıdi. Ol sálemdemeniń qandaı baǵdarmen júrgenin anyqtap, taýar joǵalǵan jaǵdaıda poshta ákimshiligine habarlasyp otyrady.
«Barlyq saýaldarǵa jaýap beretin call-ortalyǵymyz da bar. Ol sálemdemelerdi izdeý jáne atalǵan problemany sheshýmen aınalysatyn arnaıy top. Aıta keterligi, qalaı desek te adamı faktor qala beredi. Degenmen, 0,03 paıyzdy kóp dep oılamaımyz. Búkilálemdik poshta odaǵynyń senimdilik reıtıngine sáıkes biz 26 orynda, al TMD elderi ishinde birinshi orynda turmyz», - dedi Azat Mashabaev.
