«Qazposhta» sálemdemede joǵalǵan telefon týraly aqparat úshin sotqa júginedi
NUR-SULTAN. QazAqparat – «Qazposhta» AQ sálemdemede joǵalǵan telefon týraly aqparat úshin sotqa júginedi. Bul týraly «Qazposhta» AQ táýekelder jáne komplaens jónindegi basqarýshy dırektory Nurqanat Nuraqynov aıtyp berdi, dep habarlaıdy QazAqparat tilshisi.
«Іshki qyzmettik tekserý rastaǵandaı, Qazposhta» AQ-ǵa qatysty taratylǵan málimetter shyndyqqa sáıkes kelmeıdi. Osyǵan baılanysty biz kompanııanyń ımıdjdik iskerlik bedeline nuqsan keldi dep esepteımiz, óıtkeni osyndaı aqparattyń taralýynan qoǵamnyń iskerlik bedelge teris áseri qalyptasady», - dedi N. Nuraqynov «Qazposhta» ǵımaratynda ótken brıfıngide.
Osyǵan baılanysty, spıkerdiń aıtýynsha, kompanııa zańdy múddelerin qorǵaý úshin azamattyq sot isin júrgizý tártibinde sot organdaryna júginýge májbúr.
«Tıisti quzyretti organdar kompanııaǵa qatysty aqparat taratqan adamnyń is-áreketine quqyqtyq baǵa beredi. Sonymen birge, eldiń azamattyq zańnamasynda kózdelgen tártippen kompanııa kináli adamnyń teris málimet taratýynan kelgen yqtımal zalaldy óteýi máselesin qarastyrady», - dep túıindedi N. Nuraqynov.
Aıta keteıik, 10 aqpanda birqatar BAQ-ta elorda turǵyny Ilıa Grıshko týraly sıýjet shyqqan edi. Onda I. Grıshko «Qazposhta» sálemdemesinde ózi tapsyrys bergen uıaly telefonnyń joǵalýyna shaǵymdanǵan.
Bul daýly oqıǵaǵa «Qazposhta» AQ Poshta qyzmetteri jáne E-commerce boıynsha basqarýshy dırektory Álııa Súgirbaeva jaýap bergen edi.
