«Qazposhta» sálemdemede joǵalǵan IPhone týraly túsinikteme berdi
NUR-SULTAN. QazAqparat – «Qazposhta» AQ Poshta qyzmetteri jáne E-commerce boıynsha basqarýshy dırektory Álııa Súgirbaeva AQSh-tan jetkizilgen sálemdemedegi uıaly telefonnyń joǵalýy jónindegi daýly oqıǵaǵa pikir bildirdi, dep habarlaıdy QazAqparat tilshisi.
Onyń aıtýynsha, bul halyqaralyq poshtalyq jóneltim AQSh-tan Ystanbul reısiniń tranzıti arqyly Qazaqstannyń Almaty qalasyna jetkizilgen.
«2021 jyldyń 22 qańtarynda áýe reısi kelgen sátte bul poshta jóneltimi Almaty qalasy ýchaskesiniń qyzmetkerlerine berilgen. Olar birden Almaty qalasy Kedendik baqylaý departamentiniń Jetisý keden beketiniń qyzmetkerlerine kedendik tekserýge usynǵan. Keden zańnamasyna sáıkes, kelip túsetin barlyq halyqaralyq jóneltimder mindetti túrde kedendik tekserýden ótýi tıis. Tekserý kezinde keden beketiniń qyzmetkerleri jóneltimniń derekterin kedendik deklaratsııamen salystyrady, onda jóneltýshiniń, alýshynyń mekenjaıy, taýar (salynym) ataýlarynyń tolyq tizbesi jáne árbir salynymnyń quny kórsetiledi. Jetisý keden beketi qyzmetkeriniń tekserýi barysynda kedendik deklaratsııaǵa sáıkes, bul klıenttiń poshta jóneltimindegi taýarlardy salý tizbesinde uıaly telefon kórsetilmegen», - dedi Á. Súgirbaeva «Qazposhta» ǵımaratynda ótken brıfıngide.
Sonymen birge spıker poshta jóneltiliminiń rentgen-televızııalyq qondyrǵy arqyly ashpaı skanerlengenin jáne onda uıaly telefonnyń kórsetilmegenin jetkizdi.
«Kompanııa Almaty qalasynyń memlekettik kirister departamentine atalǵan poshta jóneltilimin tekserý boıynsha rentgen-teledıdar jabdyqtarynyń arhıvin qaraýǵa resmı suraý saldy. 12 aqpanda departament qyzmetkerleri resmı jaýap berip, beınematerıaldar arhıvine sáıkes, kedendik tekserý organdarynyń osy sálemdemeni tekserýi kezinde uıaly telefonnyń bolmaǵany týraly akt jasady.
Bul jóneltimdi ınternet-dúken emes, jeke adam jibergen, alýshy retinde Ilıa Grıshko kórsetilgen. Sondaı-aq, 72-deklaratsııaǵa sáıkes, poshta jóneltilimderi tiziminde IPhone12 uıaly telefony kórsetilmegen, bul barlyq tıisti qujattar arqyly rastalǵan. Onyń ústine, uıaly telefon jiberilgen jaǵdaıda, jiberýshi mindetti túrde kedendik deklaratsııada onyń qunyn kórsetýi kerek», - deıdi Á. Súgirbaeva.
Aıta keteıik, 10 aqpanda birqatar BAQ-ta elorda turǵyny Ilıa Grıshko týraly sıýjet shyqqan edi. Onda I. Grıshko «Qazposhta» sálemdemesinde ózi tapsyrys bergen uıaly telefonnyń joǵalýyna shaǵymdanǵan.
