Qazposhta men Qazaqfılm jańa poshtalyq marka shyǵardy

NUR-SULTAN. QazAqparat – Búgin Tsıfrlyq damý, ınnovatsııa jáne aeroǵarysh ónerkásibi mınıstrligi «Qazaq kınosynyń altyn qory» poshtalyq markasynyń toptamasynan «Atamannyń aqyry» kórkem fılmine 50 jyl» atty poshta markasyn aınalymǵa engizdi, dep habarlaıdy QazAqparat tilshisi.

Bul týraly Sh.Aımanov atyndaǵy «Qazaqfılm» AQ-nyń Instagram paraqshasynda jarııalandy. Taralymy 10 myń danalyq poshta markasynyń nomınaldy quny - 300 teńge.

«Atamannyń aqyry» fılminiń túsirilimine ótken ǵasyrdyń jetpisinshi jyldaryndaǵy ulttyq kınonyń úzdik mamandary qatysqanyn atap ótken jón. Naqtyraq aıtqanda, rejısser Sháken Aımanov, stsenarıı avtorlarynan Andreı Mıhalkov-Konchalovskıı jáne Edýard Tropın, akterlerden Asanáli Áshimov, Nurmuhan Jantórın, Nurjuman Yqtymbaev, Altynaı Eleýova jáne basqalar jumyldyrylǵan. 1972 jyly fılmniń ózi, sondaı-aq stsenarıster men akter Asanáli Áshimovke Qazaq KSR Memlekettik syılyǵy berildi.

Pandemııa kezinde Sh.Aımanov atyndaǵy «Qazaqfılm» kınostýdııasy YouTube arnasynda ýaqyt synynan ótken ańyzǵa aınalǵan fılmderdi aqysyz tamashalaýǵa jol ashty. Kórermender qazaq kınosynyń «Altyn qoryna» engen ulttyq kınematografııanyń eń tanymal jaýharlaryn tamashalaýǵa múmkindik aldy.