Qazposhta maıdanger Móráli Shámenovke arnalǵan marka shyǵardy

ASTANA. QazAqparat - «Qazposhta» AQ ataqty áskerı barlaýshy, fın jáne Uly Otan Soǵysyna qatysqan, belgili qoǵam qaıratkeri Móráli Shámenovtiń 100 jyldyq mereıtoıyna arnalǵan «Estelik jáne mereıtoılyq kúnder» serııaly poshtalyq markanyń aınalymǵa engizilgenin habarlaıdy.

Kompanııanyń baspasóz qyzmetiniń habarlaýynsha, poshtalyq markada soǵys ardageri, barlaý ofıtseri, erjúrek jaýynger, soǵystan keıin qyzmetin Shyǵys Germanııada jalǵastyrǵan Móráli Shámenov beınelengen. Barlaý ofıtseri, kapıtan Shámenov Baltyq mańyndaǵy jáne Belorýssııa maıdandarynyń 326 Atqyshtar dıvızııasynyń qorǵanys jáne shabýyldy urystarynyń qatysýshysy bolǵan, onyń basshylyǵymen kóptegen sholý operatsııalary men jaýyngerlik isteri sátti ótkizilgen.

Uly Otan soǵysy aıaqtalǵannan keıin jýrnalıst, qoǵam qaıratkeri, aýylsharýashylyǵynyń óndirisshi mamany bolǵan.

Áskerı erligi men eńbektegi qyzmeti úshin Móráli Shámenov Lenın, Qazan tóńkerisi, Otan soǵysynyń І jáne ІІ dárejeli ordenderimen, Qyzyl juldyz, «Qurmet belgisi» jáne basqa da kóptegen medaldarmen marapattalǵan.

Poshtalyq marka ofsettik basylymda 2 boıaýmen 105 markadan turatyn markalyq paraq túrinde shyǵarylǵan. Poshtalyq markanyń nomınaly - 50 teńge. Taralymy 2 mln dana. Sýretshi - Sergeı Marshev. Poshtalyq markalar «Qazaqstan Respýblıkasynyń Ulttyq Banki Banknottyq fabrıkasy» respýblıkalyq memlekettik kásipornynda basyp shyǵarylǵan.

Eske sala ketsek, «Qazposhta» AQ - poshtalyq, qarjylyq jáne logıstıkalyq qyzmetterdi usynatyn Qazaqstan Respýblıkasynyń ulttyq poshta operatory. Dúnıejúzilik pochta odaǵynyń múshesi, VISA International jáne MasterCard Worldwide halyqaralyq tólem júıeleriniń prıntsıpti qatysýshysy. «Samuryq-Qazyna» AQ kompanııanyń jalǵyz aktsıoneri.