«Qazposhta» qyzmetkerleriniń jalaqysy 10 paıyzǵa kóterilmek - Májilis
ASTANA. QazAqparat -«Qazposhta» aktsıonerlik qoǵamy óz qyzmetkerleriniń jalaqysyn 10 paıyzǵa kótermek.
Bul týraly búgin Májilistiń Áleýmettik-mádenı damý komıtetiniń keńeıtilgen otyrysynda málim boldy. Komıtet tóraıymy Darıǵa Nazarbaevanyń jetekshiligimen ótken jıynda «Qazposhta» AQ búgingi jaǵdaıy men bolashaǵy talqylandy. «Qazposhta» AQ tóraǵasy Ashat Beısenbaevtyń aıtýynsha, byltyrǵy jylǵy kompanııanyń tabysy 267 mln. teńgeni quraǵan. «Aǵymdaǵy jylǵa josparymyz budan da joǵary. Degenmen, bul jospar kútilip otyrǵan qosymsha shyǵystardyń ulǵaıýyna baılanysty qaıta qaralýy múmkin. Bul shyǵystar negizinen óndiristik personaldyń aılyq jalaqysyn 2014 jyldyń 1 sáýirinen bastap 10 paıyzǵa arttyrýǵa da qatysty bolyp tabylady», - dedi Ashat Beısenbaev.
Jalpy, búgingi kúni qazaqstandyq poshtada shamamen 22 myń personal qyzmet etedi, elimiz boıynsha 3131 bólimshesi, 14 oblystyq fılıaly, Astana men Almaty qalalarynda 2 poshtampty, 7 mamandandyrylǵan fılıaly jumys jasaıdy. Onyń ishinde 2185 óndiristik nysany aýyldyq óńirlerde, 676 birligi qalalarda, 156-sy aýdan ortalyqtarynda ornalasqan jáne 114 jyljymaly bólimshesi bar.
