«Qazposhta» qyzmetkerleri muǵalimniń eńbek demalysynyń aqshasyn ustap qoıǵan
KÓKShETAÝ. QazAqparat - Aqmola oblysynda «Qazposhta» qyzmetkerleri muǵalimderdiń eńbek demalysy aqysyn ysyrap etkeni anyqtaldy, dep habarlaıdy QazAqparat tilshisi oblystyq PD baspasóz qyzmetine silteme jasap.
Vedomstvonyń málimetinshe, aǵymdaǵy jyldyń 12 aqpanynda Qorǵaljyn aýdandyq PB kezekshilik bólimine 74 jastaǵy jergilikti turǵyn aryzdanyp, 2016 jyldyń kókteminde «Qazposhta» bólimshesinde 200 myń teńge somasynda demalys tólemin tólemegenin aıtqan.
«Anyqtalǵandaı, 2016 jyly zardap shekken adam eńbek demalysy aqshasyn alýy kerek edi. Alaıda, muǵalim demalysqa shyqqannan keıin ol qalaǵa ketip, aqshasy týraly umytqan. Keıin elge oralǵan soń, birneshe jyl ótken soń eńbek demalysy aqshasyn almaǵany esine túsedi. Sóıtip, qart muǵalim polıtsııaǵa habarlasady»,- dedi vedomstvodan.
Jedel izdestirý sharasy barysynda polıtsııa qyzmetkerleri kúdiktilerdi anyqtady. Olar 2016 jyly «Qazposhta» fılıalynyń kassıri bolyp jumys istegen 39 jáne 52 jastaǵy Qorǵaljyn aýdanynyń turǵyndary.
«2016 jyldyń shildesinde áıelder basqa adamdardyń aqshasyn alyp, olardy zańdy alýshyǵa bermeı, óz qajettilikterine jumsaǵany belgili boldy. «QazposhtaQUOT» fılıalynyń burynǵy qyzmetkerlerine qatysty Qylmystyq kodekstiń 189-baby 2-bóligi «senip tapsyrylǵan múlikti ıemdený nemese ysyrap etý» boıynsha sotqa deıingi tergeý sharalary júrgizilýde», - dep tolyqtyrdy vedomstvodan.
